Ubuhamya bwa Sarafina Namwana wari umuforomokazi, akaza gufungwa ku bw’amaherere we n’umugabo we bazira ko ari abatutsi, bikaza no kumuviramo kudasubira mu kazi nyuma y’igifungo, bwagaragaje itotezwa abatutsi bagiye bagirirwa mu buryo butandukanye harimo mu myingire no mu guhabwa imirimo.

Aha ni na ho Umuyobozi w’Akarere ka Huye Wungirije ushinzwe Ubukungu, Mutwarasibo Cyprien, yahereye abwira abakozi bo mu Karere ka Huye bari bitabiriye iki gikorwa cyo kwibuka, ko bakwiye gukora neza umurimo Leta yabashinze wo gukorera Abaturarwanda, bakirinda ivangura iryo ari ryose: ngo nko kubona umukozi ugatangira kwibaza icyo ari cyo aho kureba icyo mwakorana kugira ngo mukorere umuturarwanda si byo.

Jean Pierre Nsabimana ukuriye Ibuka mu Karere ka Huye, we yagaragaje ko ibibazo bibangamiye imiryango y’ abari abakozi muri rusange bisa nk’ ibibangamiye abandi Banyarwanda barokotse Jenoside muri rusange.

Bakaba bifuza ko ubuyobozi bwakwita cyane ku kibazo cy’imanza z’imitungo yangijwe muri Jenoside zitararangizwa, no kubakira incike ahantu hamwe kugira ngo hanashyirweho n’ uburyo buhuriweho bwo kuzitaho.

Yibukije kandi ko abatarabasha gushyingura ababo bishwe muri Jenoside bibababaje cyane, maze yifuza ko hagaragazwa imibiri itaraboneka kugira ngo ishyingurwe mu cyubahiro.

Kuri ubu, abari abakozi bibukwa mu makomini yahujwe akaba Akarere ka Huye bamaze kumenyekana ni 87.

Kwandika amateka ya Jenoside yakorewe Abatutsi muri buri mudugudu, nk’umuhigo Akarere ka Huye kihaye, ngo biri mu bizatuma abataramenyekana na bo bamenyekana.

Marie Claire Joyeuse