Mu butumwa batanze, abashyinguye ababo kuri uyu munsi bavuze ko bumva baruhutse ku mutima nyuma y’imyaka 21 batari bakabonye ababo ngo babashyingure mu cyubahiro.

Gusa na none, ngo bahangayikishijwe cyane n’Abarundi bari baraje bitwa impunzi hanyuma bakifatanya n’interahamwe mu guhitana imbaga y’Abatutsi bo ku Mayaga.

Abarokokeye aha, bavuga ko Abarundi bagaragaje ubugome budasanzwe, aho bicaga abantu barangiza bakabanywa amaraso bakanarya imyijima yabo.

Mugabo Emmanuel, wari uhagarariye imiryango yashyinguye ababo kuri iki cyumweru, yavuzeko baruhutse ku mutima nyuma y’imyaka 21 ababo batarashingurwa mu cyubahiro, ariko agasaba ko hakoreshwa imbaraga zidasanzwe mugushakisha abo Barundi na bo bakagezwa imbere y’ubutabera.

Gasangwa Juma, ni umwe mu barokokeye Jenoside ahitwa ku Mayaga. Ahamya ko aka gace abatutsi baho bagerageje kwirwanaho ariko kubera ikibazo cy’Abarundi bari barigishijwe ubugome bakaza kwivanga n’interahamwe bigatuma abirwanagaho bananirwa kuko bo bakoreshaga intwaro gakondo nk’imiheto n’amabuye mu gihe abo bahanganaga bari banafite imbunda.

Nyuma y’ubu buhamya bwagiye butangwa ku mpande zose, Umunyamabanga wa Leta muri Minisiteri y’Ubuzima, Dr Ndimubanzi Patrick, yasabye buri wese kugira uruhare mu kurwanya abahakana n’abapfobya Jenosede, kugira ngo ibyabaye ntibazasubire ukundi.

Imibiri 105 yashyinguwe kuri iki cyumweru, ije isanga indi ibihumbi 60 yashyinguwe mu mwaka wa 2014 yakuwe mu cyobo kitwaga CND bavuga ko cyari cyaracukujwe n’uwari Burugumesitiri wa Komine Ntongwe, Kagabo Charles.

Eric Muvara