Umunyamabanga nshingwabikorwa w’Umurenge wa Shangi, Nyirazigama Marie Rose, avuga ko uyu mugabo ashinjwa n’abaturage kuvuga amagambo mabi yatumye umwe mu bari bitabiriye ibiganiro ataha ababaye ndetse yagera mu rugo agahungabana.

Ngo Nsanzamahoro yavugiye mu biganiro ubwo bari barimo kungurana ibitekerezo mu Mudugudu wa Busasamana uburyo abatutsi bagiye bicwa ndetse ngo agenda avuga aho bagiye bajugunywa, agiye gusoza avuga ko ngo hari abantu bafunzwe bazira ubusa ndetse ko nawe yafunzwe azira ubusa, ndetse avuga ko ufungiye kwica umwana w’umwe mu bari bahari arengana.

Ibi ngo akimara kubivuga umubyeyi w’uwo mwana yahise ataha ndetse ageze mu rugo arahungabana.

Ngo ibi byatumye bahamagaza Nsanzamahoro bamusaba gusaba imbabazi mu ruhame uwo yatumye ahungabana arabikora, ariko basanga bitarangira gutyo bahamagaza abashinzwe umutekano ngo abe aribo bazabikurikirana neza.

Agira ati “Ibi twabyumvise ku wa gatandatu w’icyumweru gishize ko uriya mugabo yavuze ibintu biganisha ku ngengabitekerezo ya Jenoside ndetse bituma umwe mu babibwiwe ahungabana, twaramuhamagaye ku cyumweru no ku wa mbere tumusaba gusaba imbabazi mu ruhame ndetse tumushyikiriza n’abashinzwe umutekano”.

Uyu mugabo ukekwaho ingengabitekerezo ya Jenoside afungiye kuri Sitasiyo ya Polisi ya Ruharambuga (Ntendezi).

Umugwaneza Jean Claude