Yabivuze ku wa 12 Mata 2015, ubwo yatangaga ikiganiro muri Kaminuza y’u Rwanda/ Ishami rya Nyagatare ku butabera n’imiburanishirize y’imanza za Jenoside.

Minisitiri Busingye yavuze ko igihugu gitegura Jenoside kiba kitagira ubutabera, kitagendera ku mategeko, agaciro ka muntu kakabura.

Ngo ibyo byose bibyara umuco wo kudahana no kudaha agaciro umuntu ahubwo agategekeshwa igitugu.

Minisitiri Busingye asanga Jenoside yakorewe Abatutsi yarabaye kubera ko ubumwe bw’Abanyarwanda bwari bumaze kubura.

Yagize ati “Ubumwe bw’Abanyarwanda ni ishoramari rikomeye dukora ntawe ukwiye kongera kugira uburenganzira bwo kubuhungabanya, kuko ni bwo bwatuma dukemura ikibazo cyose twagira. Ntidukwiye kwemera ko hari uwabuhungabanya.”

Minisitiri Busingye yasabye urubyiruko gushingira ku bimaze gukorwa mu rwego rw’ubutabera, bakabishyigikira ntahazagire uwongera kurengana kubera impamvu zitandukanye zirimo amacakubiri, bakubaka igihugu kizira akarengane.

Agaruka ku ipfobya n’ihakana rya Jenoside, Minisitiri w’Ubutabera yavuze ko babiterwa no kuba bari bizeye ko ibyo bateguye bazabigeraho ijana ku ijana no guhishirana kugira ngo ukuri kutamenyekana.

Mu bibazo byabajijwe hafi ya byose byibanze ku bakoze Jenoside bakidegembya hirya no hino ku isi, imitungo y’abarokotse idasubizwa no kuba Loni ntacyo ifasha ngo abasize bakoze amahano bahanwe aho bari hose.

Minisitiri Busingye yizeje ko byose bizashoboka kuko aho abasize bakoze Jenoside bahungiye ari na bo kenshi babashyigikiye kuyikora.

SEBASAZA Gasana Emmanuel