Umuyobozi w’Akarere ka Nyabihu, Twahirwa Abdoulatif, yavuze ko mu Karere ka Nyabihu haguye Abatutsi bagera ku 7645.

Gusa, Umuyobozi wa IBUKA, Juru Anastase, we anavuga ko abo ari abazwi ariko ko hari n’abandi benshi bashobora kuba barahiciwe batari bazi kuko muri ako karere hazanwaga abantu benshi bakahicirwa baturutse ahandi hatandukanye.

Nubwo imibare izwi y’abahaguye ari 7645, kuri ubu ngo hamaze gushyingurwa mu cyubahiro imibiri 6294 gusa.

Iyi mibiri ikaba irimo iyashyinguwe mu Rwibutso rwa Jenoside rwa Kanzenze muri Rubavu igera ku 4070. Juru akaba avuga ko iyo mibiri yajyanweyo kubera ko Urwibutso rwa Mukamira rwari rutaruzura.

Hiyongeraho imibiri 2053 yari isanzwe ishyinguwe mu cyubahiro mu Rwibutso rwa Mukamira. Kuri uyu wa 13 Mata 2015 bakaba bahashyinguye mu cyubahiro indi mibiri 21 yabonetse.

Uretse iyo ngo hari n’indi mibiri 150 ishyinguwe ahitwa Cyambara muri Bigogwe ndetse na Kagohe muri Jenda,buri hose hakaba hashyinguwe imibiri 75.

Ukurikije imibare izwi y’Abatutsi bivugwa ko biciwe mu Karere ka Nyabihu muri Jenoside ngo haracyari imibiri irenga 1000 itaraboneka ngo ishyingurwe mu cyubahiro.

Umunyamabanga Nshingwabikorwa w’Intara y’Iburengerazuba, Jabo Paul, ndetse na Dr Bideli Diogène, Umukozi muri Komisiyo y’igihugu ishinzwe kurwanya Jenoside CNLG, basabye abaturage bo mu Karere ka Nyabihu gutanga amakuru k’ uho iyo mibiri yaba iherereye kugira ngo izashyingurwe mu cyubahiro.

Ni nyuma y’aho umuyobozi wa IBUKA mu Karere ka Nyabihu, Juru Anastase, n’Umuyobozi w’Akarere w’ako karere batangaje ko hari abaturage usanga baba bashobora kuba bafite amakuru y’aho iyo mibiri iri, ariko ntibayatange ahubwo ngo ugasanga atangwa n’abana.

Safari Viateur