Minisitiri Uwacu yagize ati “Aba bakoze Jenoside, uretse no kwanga abatutsi, ariko na bo bariyangaga kuko bishe igihugu, kandi iyo bikomeza na bo bari kwicana”.

Avuga ko ibikomere bya Jenoside bidafitwe n’abayirokotse gusa ahubwo n’abayikoze yabagizeho ingaruka kuko babuze amahoro, bakaba birirwa bazenguruka isi bagerageza kugoreka no gupfobya amateka ya Jenoside.

Cyakoze Minisitiri Uwacu atangaza ko umuryango nyarwanda cyane cyane abacitse ku icumu biteguye kubabarira abakoze Jenoside bagafatanya n’abandi kongera kubaka igihugu. Yagarutse no ku kibazo cy’abinangira kwishyura imitungo bangije muri Jenoside, abasaba kugikemura kuko ibyo babazwa ari ugushyira mu bikorwa umwanzuro w’urubanza rwaciwe n’inkiko Gacaca.

Guverineri w’Intara y’amajyepfo, Alphonse Munyantwali, ahamya ko abatutsi bishwe bapfanye n’u Rwanda kuko abapfuye bari bambuwe agaciro mu gihugu cya bo.

Ati “Abatutsi mu babishe harimo n’abanyamahanga babaga mu Rwanda, aho umunyamahanga nk’abafaransa bakaga indangamuntu umunyarwanda kandi ari mu gihugu cye”.

Akomeza avuga ko uwishe u Rwanda atabashije kwica umutima wa rwo, kuko kuri ubu harimo kubakwa Ubunyawanda bushingiye ku bumwe. Yasabye abitabiriye umuhango wo kwibuka gushyira hamwe no gukundana bakirinda icyabateramo amacakubiri.

Abayobozi bose bashimye intambwe imaze guterwa n’abanyarwanda mu kwifatanya n’abarokotse kwibuka ababo bazize Jenoside, kuko kwibuka bitanga imbaraga ku bakiriho zo guharanira ko Jenoside itazongera kuba.

Mu kwibuka Jenoside kandi abarokotse Jenoside bashimira ingabo z’ Inkotanyi, kuko zahagaritse Jenoside. Uwanyirigira Françoise watanze ubuhamya yise ngo “kubaho kw’inkoko ntabwo ari impuhwe z’agaca”, avuga uburyo yarokokanye n’umwana yabyaye muri Mata 1994, agatangaza ko ubwo yageraga mu maboko y’Inkotanyi yagaruye icyizere cyo kubaho.

Marie Josée Uwiringira