Kuwa gatanu tariki 14 Gashyantare, mu murwa mukuru w’Ubuholandi La Haye, ni bwo bizihije igitambo cya Misa mu kiliziya yitwa Church of Our Saviour, yari iyobowe na padiri Sjaak de Boer yitabirwa n’Abanyarwanda benshi baba mu Buholandi, abayobozi batandukanye bo muri icyo gihugu, abahagarariye ibihugu byabo ndetse n’izindi nshuti z’u Rwanda.

Abitabiriye umuhango bakoze urugendo bajya gucana buji havugwa n’amajambo y’abantu batandukanye barimo ambasaderi Karabaranga Jean Pierre uhagarariye u Rwanda mu Buholandi, umuyobozi wa IBUKA Dr. Dusingizemungu Jean Pierre, Mundele Christian uhagarariye IBUKA mu Buholandi na Jan Pronk wigeze kuba ministre w’Ubuholandi ushinzwe iterambere n’ubufatanye kuva mu 1989 kugeza mu 1998.

Mu ijambo rye, Ambasaderi Karabaranga yavuze ko kwibuka ku nshuro ya 20 ku Banyarwanda ari iby’agaciro kanini, kuko ari igihe cyo gusubiza amaso inyuma bakareba ibitaragenze neza mu mateka yabo byatumye habaho Jenoside yakorewe Abatutsi.

Ibi bizatuma Abanyarwanda babasha guhangana n’ingaruka za Jenoside kugira ngo babashe kubaka umuryango utajegajega ubereye Abanyarwanda bose, baba ab’iki gihe ndetse n’abazabakomokaho.

Gasana Marcellin