Barahira ni umwe muri ba burugumesitiri bayoboye komini Kabarondo mbere ya Jenoside. Bamwe mu barokokeye i Kabarondo bavuga ko urugendo rwe mu buyobozi rwaranzwe n’urugomo yakoreraga abatavuga rumwe na we, by’umwihariko Abatutsi.

Jenoside itangira Barahira ngo ntiyari akiri burugumesitiri gusa ngo yari umuntu uvuga rikijyana icyo gihe bitewe n’uko yari akomeye mu ishyaka rya MRND, byongeye we na Col. Rwagafirita na we uvugwaho kuba mu bacuze umugambi wa Jenoside mu yari komini Kabarondo bakaba ari bo bashyiragaho ba burugumesitiri bayoboraga iyo komini.

Tito Barahira uvugwaho gutuma abantu bishora muri Jenoside.

Ibyo ngo byatumaga Barahira akomeza kugira ijambo rikomeye muri iyo komini n’ubwo atari akiyiyobora, bitewe n’uko ba burugumesitiri yashyiragaho bakoreraga mu kwaha kwe.

Barahira na Col. Rwagafirita ngo bagiye baremesha inama kenshi zacuriwemo umugambi wa Jenoside zakundaga kubera ahitwa i Gasetsa mu rugo kwa Col. Rwagafirita. Iyo izo nama zabaga Abatutsi b’i Kabarondo ngo babaga bafite ibibazo kuko n’uwari usanzwe abavugisha neza atongeraga kubavugisha.

Abavuganye na Kigali Today bazi neza Barahira n’abo bagiye bakorana banze ko amazina ya bo atangazwa.

Barahira upfutse igitambaramo mu mutwe ubwo yatabwaga muri yombi.

Umwe muri bo yasobanuye uruhare rwa Barahirwa muri Jenoside agira ati “Barahira navuga ko yateguye Jenoside kubera izo nama yaremeshaga. Igihe cya Jenoside yarishe aravuga ngo atanze n’urugero. Ku musozi wa Cyinzovu ntabwo bari bicanye, ariko Barahira yaraje ajya ku witwa Ntirushwamaboko François, bavuga ko yamuteye inkota avuga ngo ‘baturage mbahaye urugero na bo batangira kwica’”.

Akomeza avuga ko Barahira yahagarikiye Jenoside kuko yagenzuraga za bariyeri, ndetse tariki 13 Mata 1994 Barahira yagiye kuvangura abatarahigwaga bari bivanze mu Batutsi mu bari bahungiye mu kiriziya ya Kabarondo.

Jenoside yabereye i Kabarondo ngo bwahagarikiwe na Barahira na Col. Rwagafirita.

Nyuma ya Jenoside, Tito Barahira yahungiye mu gihugu cy’u Bufaransa bikavugwa ko yaba yarahise ahindura izina akiyita Barahirwa. Tariki 03 Mata 2013 yatawe muri yombi n’ubucamanza bw’icyo gihugu nyuma y’uko leta y’u Rwanda yari yagishyikirije impapuro zo kumuta muri yombi mu mwaka wa 2009, imukurikiranyeho ibyaha bya Jenoside yakorewe Abatutsi mu w’1994.

Abarokokeye i Kabarondo ngo bifuza ko yazoherezwa mu Rwanda akaburanishirizwa aho yakoreye ibyaha aregwa.

Cyprien M. Ngendahimana