Iyo mibiri ni iyari isanzwe ishyinguwe mu buryo butaboneye, ikaba yarimuwe igashyingurwa mu rwibutso ruherutse kubakwa aho i Mpare.

Nubwo nta mubiri mushyashya washyinguwe, abarokotse Jenoside ngo si ko bose barabasha kumenya aho ababo bashyizwe bamaze kwicwa, kugira ngo babashe kubashyingura mu cyubahiro.

Ibi ngo bituma umutima wabo udatuza, bagahora basaba ababa bazi aho bari kuhabarangira.

Aha ni na ho Perezida wa Sena, Hon. Bernard Makuza, na we wari waje kwifatanya n’Abanyempare, yahereye ashishikariza ababa bafite ayo makuru kuyatanga.

Yagize ati “Nubwo byagiye bigarukwaho ariko nongere mbivuge, turabasaba yuko rwose ababa bazi aho abishwe muri Jenoside tutaramenya aho baherereye ngo na bo tubashe kubashyingura, bagira umutima wa kimuntu, bakabivuga kugira ngo na bo tubashyingure mu cyubahiro, kuko ari ngombwa.”

Yunzemo ati “Simbivugiye hano gusa, ariko n’ahandi hirya no hino, ababa bazi aho imibiri yagiye ishyirwa ntibahavuge, bamenye y’uko ibyo atari ibyo mu Rwanda tugezemo ubu. Kandi, uretse no kubagaya, ahubwo amaherezo bagomba kubona ko na bo ubwabo bitesha agaciro.”

Athanasie Mukeshimana, ukomoka i Mpare, akaba ari na ho iwabo bari batuye mu gihe cya Jenoside, mu buhamya bwe yavuze inzira y’umusaraba yanyuzemo, anavuga ukuntu ababyeyi, abavandimwe n’inshuti babishe areba. Ati “babatemye nk’abatema imitumba bagiye kugaburira inka.”

Yabwiye abandi barokotse Jenoside ko ubu yabashije kwiyakira, akanabasha kubabarira abamwiciye abe, abikesha gusenga maze abasaba kugenza nka we agira ati “Ndasaba buri wese gusenga kuko Imana ari yo yonyine yamukiza ibikomere.”

Marie Claire Joyeuse