Hagiye gusohorwa umuzingo w’ indirimbo zo kwibuka z’abahanzi ba Gospel
Nyuma y’uko igikorwa “More Than Music” kibaye ku nshuro ya gatatu kuri iki cyumweru tariki 14.6.2015, igikorwa gihurirwamo n’abahanzi batandukanye n’amakorali bose baririmba indirimbo zihimbaza Imana (Gospel) mu rwego rwo kwibuka Abanyarwanda bazize Jenoside yakorewe Abatutsi ngo hagiye gusohorwa umuzingo (alubumu) ikubiyemo indirimbo zose zo kwibuka zagiye zikorwa n’abahanzi ba Gospel.
Eric Mashukano, Umuyobozi wa Moriah Entertainment ifatanya na Positive Production mu gutegura iki gikorwa, yadutangarije ko ibi babitekereje mu rwego rwo kugira ngo babashe kubyaza umusaruro izi ndirimbo kugira ngo amafaranga avuyemo afashe incike, imfubyi, abapfakazi n’abandi bakeneye ubufasha bagizweho ingaruka na Jenoside yakorewe Abatutsi.
Eric Mashukano yagize ati “Uyu mwaka hakozwe compilation (iyegeranya) ya CD y’indirimbo zo kwibuka zahimbwe n’abahanzi batandukanye n’amakorali hakaba n’amavideo yazo, zose twazishyize hamwe, turimo turazisohora tuzigurisha hirya no hino kugira ngo amafaranga avamo tubone kuyajyana ku ncike tuzahabwa na CNLG...”
Yakomeje adutangariza ko iyo CD izajya hanze mu cyumweru gitaha ikaba ari CD yitwa "More Than Music" kandi ikazaba ikubiyemo izo ndirimbo ndetse n’incamake y’igikorwa “More Than Music” cy’umwaka ushize ndetse n’icy’uyu mwaka wa 2015.
Yagize ati “CD nayo yitwa “More Than Music” au fait ni selection (indobanure) y’indirimbo; from next week (guhera icyumweru gitaha) bizagera henshi ku buryo abantu bazabimenya.”
Iki gikorwa “More Than Music” gihuza abahanzi banyuranye baririmba indirimbo zihimbaza Imana bishyira hamwe mu rwego rwo kwibuka mu gihe cy’iminsi ijana Abanyarwanda bose bazize Jenoside yakorewe Abatutsi mu Rwanda mu w’1994, atari ukwibuka gusa abahanzi bazize Jenoside.
Marie Clemence UWIMANIMPAYE
Ibitekerezo
Ohereza igitekerezo
|