Ni igikorwa cyabaye kuri uyu wa Gatandatu tariki 13 Mata 2024, ubwo hasozwaga icyumweru cyo kwibuka, cyabereye ku rwibutso rwo ku Irebero rusanzwe rwibukirwaho abanyapolitiki 12 biyongereyeho andi mazina 9, bose bakaba bahuriye ku kuba barishwe bazira ibitekerezo byabo, ariko by’umwihariko bakaba bararwanyije amacakubiri n’umugambi mubisha wo kurimbura Abatutsi, kugera aho babizira.

Umuvugizi w’Ihuriro ry’Igihugu nyunguranabitekerezo ry’imitwe ya Politiki, Abasi Mukama, avuga ko mu gihe barimo kwibuka ku nshuro ya 30 Jenoside yakorewe Abatutsi mu 1994, hari byinshi byaharaniwe n’abanyapolitiki bishwe bishimira ko byagezweho.

Ati “Turashimira ku rwego rwa Politiki ko Igihugu kiyobowe neza, imitwe ya politiki yose ikaba yarahisemo gukora politiki y’ubwumvikane, kujya inama, koroherana no guharanira ubumwe bw’Igihugu n’Iterambere. Imitwe ya politiki ikaba ishima ukuntu ikora mu bwisanzure, bitandukanye n’abadashakira u Rwanda amahoro ibyo birirwa bavuga.”

Akomeza agira ati “Turishimira kandi imiyoborere y’u Rwanda ishingiye ku muturage, akagira uruhare mu bimukorerwa, abayobozi bakabazwa ibyo bashinzwe gukorera abaturage. Twishimira kuba uyu munsi imitwe ya politiki ihagarariwe mu nzego zifata ibyemezo, buri mutwe wa politiki uri mu Rwanda ufite umuyoboke mu Nteko Ishinga Amategeko, turishimira ko amatora mu Rwanda ategurwa neza kandi akaba mu mucyo no mu mutekano, ibiyavuyemo bikakirwa neza.”

Mu buhamya bwatanzwe n’abana ba bamwe mu banyapolitiki bibukwaga, bagiye bagaruka ku butwari, ubuhanga, urukundo, kubana n’abantu bose, bakanga ivanguramoko n’amacakubiri mu Banyarwanda, ahubwo bagaharanira ko Abanyarwanda bakubakira hamwe urwababyaye, bakaruhesha agaciro n’ishema.

Umuhungu wa Boniface Ngulinzira uri mu bibukwa yagize ati “Umubyeyi wacu Ngurinzira Boniface yaratotejwe cyane n’ubwo butegetsi bubi, n’amashyaka n’ibinyamakuru byari bifite ingengabitekerezo ya Jenoside. Urugero natanga ni uko mbere ya Jenoside yakorewe Abatutsi muri 1994, yari yarahanaguwe muri Komine yavukagamo, umuryango wacu ntaho wabarizwaga, hari abantu bahamagaraga kuri telefone yo mu rugo bakavuga ngo iki gihugu nimukivemo, abo bahamagaraga ni bo bakivuyemo kandi bijyanye.”

Perezida wa Sena y’u Rwanda Dr. François Xavier Kalinda, yavuze ko abanyapolitiki bafite inshingano ikomeye yo gukumira no kurwanya ingengabitekerezo ya Jenoside.

Yagize ati “Imitwe ya Politiki n’abanyapolitiki dufite uyu munsi, bafite inshingano ikomeye yo gukumira no kurwanya ingengabitekerezo ya Jenoside, no guharanira iteka ubumwe bw’Abanyarwanda mu bikorwa byabo bya politiki.”

Kuri uyu munsi hibukwaga abanyapolitiki hanasozwa icyumweru cy’icyunamo, nibwo kuri 12 bashyinguye mu rwibutso rwo ku Irebero, hongeweho urutonde rw’amazina y’abandi icyenda na bo bazajya bibukwa kubera uruhare bagize rwo kurwanya akarengane, no kwerekana ibitekerezo byabo bidashingiye ku ivangura n’amacakubiri byarangaga Leta y’icyo gihe.

TUMENYE ABANYAPOLITIKI BIBUKIRWA KU RWIBUTSO RWA JENOSIDE RWA REBERO.

Tariki ya 13 Mata buri mwaka, mu gusoza Icyumweru cy’Icyunamo ku rwego rw’Igihugu, ku Rwibutso rwa Jenoside rwa Rebero habera umuhango wo kwibuka abanyapolitiki bemeye guhara ubuzima bwabo bazira kurwanya… pic.twitter.com/VYwGp1KLvg

— Kwibuka Rwanda (@KwibukaRwanda) April 13, 2024

Kurikira ibindi muri iyi video: