Nzamwita François, umwe mubaharokokeye avuga ko abo bashumba batereranye abayoboke babo baricwa nyamara bari babahungiyeho ku cyicaro cy’amatorero yabo bahizereye amakiriro, ariko bagatungurwa n’uko ariho baguye kandi ntibatabarwe n’abashumba.

Ibi yabivuze ku wa 03 Gicurasi 2015, ubwo bibukaga abari abakozi b’iryo shuri ndetse n’imiryango yabo bagera kuri 34 baguye muri icyo kigo.

Muri uyu muhango, hamaganywe bikomeye abakoze Jenoside hanashimirwa abagize ubutwari bwo kurokora abahigwaga muri icyo kigo, barimo Masumbuko François waje kureba abari bakirimo akuka akabajyana kwa muganga.

Umuyobozi w’Akarere ka Rusizi wungirije ushinzwe imibereho myiza y’abaturage, Nsigaye Emmanuel, yavuze ko kwamagana abari abanyamadini n’amatorero bashoye abayoboke babo muri Jenoside ari ingirakamaro kuko ari intambwe iganisha ku iterambere ryiza hakumirwa Jenoside n’ingengabitekerezo yayo, dore ko mubihe bishize batabyumvaga neza.

Yavuze kandi ko umunsi wo kwibuka ari n’igihe cyo kubonera ho gushimira abagize uruhare rwose mu kurokora abantu mu gihe cya Jenoside.

Nsigaye yavuze ko mu bashimirwa ku isonga haza ingabo zari iza FPR-Inkotanyi zemeye kurara rwa ntambi, ntizite ku nzara n’inyota n’urugendo rukomeye rwari ruruhije muri urwo rugamba, netse zimwe muri zo zikemera no guhara amagara yazo ngo zihagarike ayo mahano isi yose yari yananiwe guhagarika.

Abarokokeye mu rwunge rw’amashuri rwa Gihundwe rw’itorero ADEPER banashimira izindi nzego zitandukanye harimo IBUKA ndetse n’itorero rya ADEPER kuba barabazirikanye bakababa hafi nyuma ya Jenoside, bakabubakira amazu yo kubamo ubu bakaba bari kugenda biyubaka ku buryo ntawaheranywe n’agahinda.

Musabwa Euphrem