Mukamuyago ari muri bane mu bapfakazi ba Jenoside yakorewe Abatutsi muri Mata 1994 Polisi y’u Rwanda yashyikirije inzu zo kubamo mu Mudugudu wa Kiberinka mu Kagari ka Gahondo ko mu Murenge wa Busasamana mu Karere ka Nyanza.

Mukamuyango uvuga ko kuva Jenoside yakorewe Abatutsi yahagarikwa mu Rwanda atari afite inzu yo kubamo. Ngo nyuma y’aho aboneye aho kurambika umusaya yumva atagikwiye kongera kwitwa ukundi umuntu utishoboye.

Yuzuye akanyamuneza n’inseko y’ibyishimo ku maso yagize ati “Ntabwo nkikwiye kongera kwita umuntu utishoboye kuko Polisi y’Igihugu impaye ubushobozi inyubakira inzu”.

Avuga ko mbere yo guhabwa iyo nzu, ngo aho yirirwaga ntabwo ari ho yararaga kubera kutagira urugo rwe bwite umuntu yamubarizamo.

Umuyobozi w’Akarere ka Nyanza, Murenzi Abdallah, yishimiye ibimaze kugerwaho ku bufatanye na Polisi birimo no kubakira abacitse ku icumu rya Jenoside batari bafite aho kuba.

Yagize ati “Polisi y’Igihugu ubufatanye bwacu na yo bushingiye kuri byinshi yaba mu kubungabunga umutekano, kurengera ibidukikije n’ibindi bikorwa bizamura imibereho myiza y’abaturage”.

IGP Emmanuel Gasana, Umuyobozi wa Polisi y’u Rwanda, yashimye intera Polisi igezeho yaba mu bikorwa byo hagati mu gihugu ndetse n’ibyo hanze yacyo bikorerwa hirya no hino ku isi aho abapolisi b’u Rwanda bari mu bikorwa byo kugarura amahoro.

Umuyobozi w’Intara y’Amajyepfo, Alphonse Munyantwari, wari umushyitsi mukuru yasabye buri wese kwita ku mutekano ngo kuko ari wo shingiro rya byose.

Jean Pierre Twizeyeyezu