Bethesda ngo irashaka ko abayisengeramo, by’umwihariko abarokotse Jenoside, bagira kwihangana n’ubutwari mu mibereho yabo, bakigana umwami Dawidi wo mu Bisirayeli, aho Bibiliya (mu gitabo cya 1Samweli7:1-58) ivuga uburyo atatinyaga kugeza ubwo yica indwanyi y’ikirangirire, Goliyati w’Umufilistiya.

Umushumba w’Itorero Bethesda, Bishop Albert Rugamba, yanamenyesheje abanyetorero, ko kwibuka no gusura urwibutso bitanga imbaraga ku muntu, zo kubasha gutekereza uko atatekerezaga, akanarushaho kwizera no gusenga nk’umuhanuzi Daniyeli (nawe uvugwa muri Bibiliya).

Bishop Rugamba agira inama amatorero gushingira ku kuri kuri ko muri Bibiliya, bakanareka ibizira kugira ngo birinde ibyago. Agira ati “Kuko iyo dusomye Bibiliya, umuntu agomba kuba intwari nka Dawidi, agasenga nka Daniyeli; abakristo nibagerageze kugendera ku byo ijambo ry’Imana rivuga”.

Kwibuka kandi ngo biratuma bamwe mu bakrito bazirikana impamvu bo batishwe muri Jenoside; aho ngo bamara kubishimira Imana nayo ikabishimira, ikabaha Umwuka Wera; urwango no gutekereza kwihorera bikavaho.

Umugiraneza Innocent-Jimmy, ngo yatekerezaga kuzaba umusirikare, akajya yica abantu nk’uko nawe hari abamugize impfubyi.

“Ntacyo byaba bimaze kuvuga ngo urasenga gusa utazi n’isi utuyemo”, Rwego Aline-Colombe nawe usengera muri Bethesda ashimangira ko igikorwa cyo kwibuka kiri mu bifasha umukristo kumenya uburyo yitwara mu buzima busanzwe.

Abakristo bo muri Bethesda bakoze urugendo rwo kujya kwibukira ku Gisozi, babanje kumva ijambo ry’Imana(mu rusengero), aho bigishijwe ko bagomba kugerageza gukira ibikomere “kuko ari byo rufunguzo rwo kugira ikindi kintu cyose umuntu yakora”, nk’uko Pastor Rukundo Octave yabibwirije.

Simon Kamuzinzi