Kuba akarere ka Nyabihu kabaye agaheruka utundi tw’Intara y’Iburengerazuba mu kwakira urumuri rutazima rw’icyizere,ngo ni amahirwe ku baturage bako, nk’uko byagarutsweho na n’umuyobozi w’aka karere Twahirwa Abdoulatif n’umunyamabanga nshingwabikorwa w’Intara y’Iburengerazuba akaba anahagarariye Guverineri Jabo Paul.

Baherekejwe n’abana baririmbye urumuri rw’icyizere, abana b’imyaka 20 bakiriye urumuri barugejeje mu mbaga y’abaturage b’akarere.

Umuyobozi w’aka karere yavuze ko nk’ahavukiye abayobozi benshi bajyanye u Rwanda mu icuraburindi, bakwiye gukomera ku rumuri no kurwigiraho byinshi. Impamvu ni uko muri aka karere ari ho havuka benshi mu bayobozi b’u Rwanda ba kera bari bagize ikiswe “Akazu” barimo Perezida wa Repubulika ya kabiri Juvenal Habyarimana, Bagosora, Zigiranyirazo n’abandi.

Bivugwa ko muri Nyabihu ari ho soko y’abazanye ibitekerezo by’umwijima, amacakubiri n’umwiryane mu banyarwanda,bikaza kurangira habaye Jenoside yakorewe Abatutsi.

Aba babiri b’imyaka 20 nibo bakiriye urumuri rw’icyizere.

Muri aka karere kuri ubu kitwa Nyabihu kari kagizwe n’amakomini azwiho amateka mabi cyane muri Jenoside kuko gafata igice k’iyitwaga komini Giciye,Karago, Mutura, Nkuri na Nyamutera.

Bitewe n’amateka mabi yaranze akarere ka Nyabihu akaba ari naho gicumbi cy’ubuyobozi bubi bwajyanye u Rwanda mu mwijima w’icuraburindi,umuyobozi w’agateganyo w’intara y’Intara y’Iburengerazuba Jabo Paul,yishimiye cyane ko aka karere kagejejwemo urumuri gasoza utundi tugize iyi ntara.

Jabo yavuze ko ari amahirwe akomeye ku baturage b’aka karere kuko nk’ahari igicumbi cy’umwijima babonye urumuri, rumurikira abaturage ngo bigire ku mateka mabi yaranze akarere batuyemo, bityo barusheho gukora ibikorwa by’urumuri bacike ku ngeso mbi izarizo zose, bimakaze iterambere rishingiye ku Bunyarwanda batandukane n’umwijima.

Binyuze mu buhamya bwatambukijwe na Kayisire Anastase warokotse Jenoside yakorewe abatutsi n’uwamufashije mu gutuma arokoka Ndagijimana Jean Bosco,ngo mu karere ka Nyabihu habaye ubwicanyi ndengakamere kuburyo Jenoside yakorewe Abatutsi baho yari umwihariko.

Ariko nk’uko Kayisire Anastase yabitangaje,ngo ubu bishimiye ko binyuze ku ngabo za RDF Jenoside yahagaritswe. Yongeraho ko binyuze mu buyobozi bwiza bwa Leta y’ubumwe,ubu umuco wo kwimakaza ubumwe n’ubwiyunge no guharanira kwigira n’iterambere,umaze gufata intera ishimishije mu karere ka Nyabihu.

Kayisire avuga ko abamusahuriye imitungo yabababariye kandi ko yanafashe icyemezo cyo gushaka mushiki w’uwamurokoye Ndagijimana Jean Paul, kugira ngo azahore yibuka ineza yamugiriye, amubyarire abana n’umuryango,bizatume nababona azajya ahora ashima Imana.

Abayobozi batandukanye n’abaturage bakiranye urumuri rw’ikizere amashyi n’impundu.

Kayisire avuga ko n’ubwo bamwe mu muryango we batamurebye neza, bavuga ko ashatse mu Bahutu, yarenze iby’amoko ubu yimakaje Ubunyarwanda. Kuri we n’umuryango we bakaba bumva ari Abanyarwanda, aho kwirebera mu ndorerwamo y’amoko.

Kuri Ndagijimana Jean Bosco wabashije kurokora benshi mu batutsi mu karere ka Nyabihu,abajyana muri Congo ari ninjoro, mu bihe bibi by’imvura. Avuga ko yabikoze kubera ko yari amaze kubona bene wabo bitaga Abatutsi bazira ubusa,kuko ubusanzwe bari babanye neza basangira byose.

Amaze kubona ko bamwe mubo yari azi bishwe,ngo nibwo yafashe icyemezo cyo gutabara uwo yumva wese ko ari umututsi kabone n’iyo bari kumwicana nabo. We icyo yarebaga n’uko yabonaga ko bose ari umwe kandi ko nta cyaha bakoze,yiyemeza kubaho mu buzima bugoye ariko atabara benshi.

Baririmba indirimbo y’urumuri rw’u Rwanda.

Ndagijimana yatangarije Kigali Today ko yagerageje gutabara benshi abo yibuka akaba ari 15, ati “ Sinjye wabikoze ni Imana yabinkoresheje kandi ikinshimisha cyane ni ukubona abo nafashije bakaba bariho,ari bazima,bakaba barabaye abagabo n’abagore bakomeye.”

Akaba ashima Leta y’ubumwe yahagaritse Jenoside ndetse igashyiraho na gahunda y’urumuri rw’ikizere,aho asanga muri Nyabihu bari bakwiye kurukomeraho kuko ruje rurushaho kubamurikira ngo barusheho kwitandukanya n’amateka y’icuraburindi yaranze aka karere.

Mu muhango wo kwakira urumuri bamwe mubo Ndagijimana yafashije bakarokoka bakaba bari baraho,bakaba bamuhobeye barira arimo gutanga ubuhamya, bavuga ko urumuri rw’ikizere rukwiye kubera umucyo buri wese,agatera intambwe nk’iyo Ndagijimana yateye,buri wese akumva ko ari umwe na mugenzi we, bityo bagasenyera umugozi umwe mu kubaka iterambere ry’igihugu.

Abaturage bari benshi harimo n’urubyiruko rwo mu mashuri abanza n’ayisumbuye mu kwakira urumuri rw’ikizere i Nyabihu.

Uyu muhango wo kwakira urumuri rutazima rw’ikizere kandi,ukaba wanagaragayemo umutangabuhamya wakoze Jenoside witwa Bagirinshuti Joseph w’imyaka 54 uyuye mu murenge wa Jenda akagari ka Bukinanyana. Yatangarije Kigalitoday ko yagiye mu gitero cyishe abatutsi i Mudende.

Nawe yiyemerera ko yishe abantu babiri, gusa nyuma ya Jenoside yarafunzwe muri 2005, nyuma aza kwirega yemera icyaha aho muri 2007 yaje guhabwa imbabazi na Perezida wa Repubulika, aho abireze bakemera icyaha bababariwe. Yakoze imirimo nsimburagifungo imyaka 13.

Kuri ubu iyo bavuze ubumwe n’umwiyunge arabyumva cyane kuko byamubayeho. Kuri ubu akaba yarasabye imbabazi abo yahemukiye, azisaba igihugu n’Imana. Yishimira ko ubu yera de,kandi ko afatanije n’abandi kubaka igihugu.

Habinshuti Joseph avuga ko nyuma yo kwiyunga n’abo yiciye,agasaba imbabazi Imana na Leta,iyo bavuze Leta y’Ubumwe,gahunda y’urumuri ndetse na Gahunda ya Ndi Umunyarwanda n’izindi zubaka abanyarwanda azumva neza.

Akaba asanga gahunda y’urumuri rutazima rw’icyizere ari gahunda nziza cyane ya leta y’ubumwe, ifasha abaturage kumva ko bavuye mu bwijima bajyanywemo n’ubuyobozi bubi, kuri ubu bakaba bari mu mucyo bagomba gukomeraho,bakawusakaza hose kandi bagaharanira kwiyubaka no kwigira.

Minisitiri w’umuco na Sport, Protais Mitali,yavuze ko agendeye ku buhamya abaturage ubwabo bo mu karere ka Nyabihu bitangiye , bigaragaza ukuri nyako kw’ibyabaye mu Rwanda kandi ko abona ko urumuri rutazima rw’ikizere rwamaze kugeramo mu baturage neza ,aho abasaba kurukomeza birinda icyaricyo cyose cyakongera kubatanya.

Yabashishikarije kwitabira ibikorwa by’urumuri n’izindi gahunda za Leta kuko bibaganisha aheza hazira amacakubiri n’ivangura iryariryo ryose,ahubwo himakaza,kwiyubaka,kwigira n’ iterambere rya buri Munyarwanda wese.

Minisitiri Mitali yasabye abatuye akarere ka Nyabihu,gusimbuza umwijima waranze amateka y’aka karere urumuri,kandi bagaharanira gukora ibijyanye n’urumuri.

Minisitiri Protais akaba asanga Nyabihu nk’ahari ku ivuko ry’abapanze kurimbura Abanyarwanda,kuba urumuri ruhageze ari umwanya mwiza wo kurusimbuza wa mwijima w’icuraburindi n’amateka yaranze Nyabihu,bityo rugafasha buri wese gukora ibikorwa bijyanye na rwo.

Mu karere ka Nyabihu hakaba hariciwe muri Jenoside yakorewe Abatutsi, inzirakarengane z’abatutsi zigera ku 7.645. Urumuri bakiriye rukaba ruvuze byinshi ku Banyarwanda bahatuye mu guharanira ko amateka y’aka karere yakosoka,umwijima wakaranze ugasimburwa n’umucyo, buri wese akibuka Jenoside yakorewe Abatutsi aharanira kwiyubaka no kwigira.

Safari Viateur