BK irakataje mu guhanga udushya mu bijyanye no gushaka ibisubizo ku bibazo by’abakiriya

Ni gahunda yo gushyiraho umuryango mugari wa BK, hagamijwe gutanga ibyiza bijyanye n’ibisubizo ku bibazo by’abakiriya babo, birimo gukora ubucuruzi, ubuhinzi, ubwubatsi n’ibindi.

Iyi gahunda izatuma umukiriya ashobora gukoresha serivisi zose za banki atavuye mu rugo, ahubwo agakoresha telefone ye cyangwa mudasobwa, izongerwamo izindi serivisi zijyanye no kwizigamira mu buryo bwose umukiriya abikeneyemo, yaba iby’igihe kigufi cyangwa kirekire, ndetse hakanongerwamo gusaba inguzanyo, ku buryo mu minsi micye iri imbere umuntu azajya ayisaba yibereye iwe mu rugo, aho azajya yohereza ibyo asabwa akoreresheje telefone, akabona ibisubizo mu minota itarenze ibiri.

Umuyobozi Mukuru wa BK, Dr. Diane Karusisi, avuga ko bimwe mu byo bakoze mu gusubiza ibibazo by’abakiriya, harimo kugabanya ibiciro.

Ati “Ubu twishimiye kubigaragariza abakiriya bacu, tubabwira ko abakiriya b’ingeri zose, abato, abakuru, abacuruzi, abanyeshuri, abamotari, abantu bafite ibikorwa ibyo ari byo byose, bose bagane umuryango wacu, kugira ngo twese hamwe tube abafatanyabikorwa mu iterambere, twubake BK dushaka, twubake Igihugu dushaka, kandi umuntu wese abigiremo uruhare.”

Dr. Karusisi avuga ko bagabanyije ibiciro kuri serivisi zimwe na zimwe ngo borohereze abakiriya

Agaruka ku gashya kari muri gahunda ya ‘Nanjye Ni BK’, Dr. Karusisi yagize ati “Agashya karimo ni serivisi zivuguruye za macye cyane, nk’ubu umuntu iyo afunguye konti nta kiguzi, ibiciro byo kohereza amafaranga twarabigabanyije, ku buryo nta yindi banki tunganya. Ibindi twakoze, iyo umuntu abonye ubutumwa bumubwira ko hari ukubikuza amafaranga byakozwe nta kiguzi, ibintu byinshi bibangamira abakiriya bacu tugenda tubikuraho, dutanga na serivisi nyinshi hakoreshejwe ikoranabuhanga.”

Akomeza agira ati “Umuntu ashobora kubona inguzanyo atagombye kuza muri banki, aba agents bacu twabahaye iyindi sisiteme yoroshye kandi yizewe, ku buryo na bo bashobora gutangiza serivisi izo ari zo zose ku bakiriya bacu. Ni byo bintu twumva ko ari itandukaniro ku yandi mabanki, twibaza ko abakiriya bacu bazabyitabira.”

Jacqueline Mukashema ni umwe mu bakiriya ba BK, avuga ko bashimira cyane urubuga BK yabashyiriyeho batangiraho ibitekerezo, kubera ko bibageraho kandi ibisubizo bikaboneka mu buryo bwihuse.

Ati “Nishimiye cyane kumenya ko hari uburyo bushya bwa Nanjye Ni BK, nishimiye kumenya ko BK yoroheje uburyo bwo gufungura konti, uburyo bworoshye cyane, bworoheye umuntu wese. BK yari izwi nk’iy’abantu bishoboye ariko ni byiza cyane kumenya ko umuntu wese yabasha kuyigeraho. Ni byiza kubona abantu bo mu ngeri zose babasha kubona serivisi za BK.”

Abakiriya ba BK barishimira uburyo bahabwa serivisi

Umuyobozi Mukuru ushinzwe ibijyanye n’ikoranabuhanga n’ubucuruzi muri BK, Desiré Rumanyika, avuga ko nta mpungenge z’uko hashobora kubaho ubujura bukoreshejwe ikoranabuhanga.

Ati “Hari amafaranga menshi twashyize mu ikoranabuhanga rituma konti y’umuntu igira umutekano uhagije, ku buryo guhera kuri telefone ukazamuka ukagera mu buryo bwa banki, hari ikoranabuhanga rihanitse ritakwemera ko haba ubujura, ntabwo bishoboka, kandi turivugurura buri munsi, kuko abajura na bo baba bivugurura.”

BK ivuga ko kuba yarakuyeho ibiciro byose, kandi ariho abandi bungukira, nta mpungenge bafite z’uko byabateza igihombo, kubera ko iyo ugize abakiriya benshi, bohereza bakanabitsa, wungukira ku bwinshi bw’ababikora, ari na byo bashaka kugeraho.

MENYA UMWANDITSI

Tarib Abdul

Umunyamakuru

@ lvRaheema

Reba inkuru zose nanditse ( 1224 )