Amashusho y’iyi ndirimbo “Ndabyemeye” ya Jean Paul Murara yakozwe na Eliel wo muri Eliel Filmz akaba yarayikoze mu buryo buri live nk’uko Jean Paul Murara we ubwe yabidutangarije.

Inyikirizo y’indirimbo ye “Ndabyemeye” igira iti: “Mana ndabyemeye, Dore ndakwimitse, Nawe unyambitse impeta, Gahore usingizwa, Nawe unyambitse impeta, Gahore usingizwa.”

Mu bitero agira ati: “Wampaye ubuzima, umpa n’abavandimwe, Bamfasha kubona inzira, none dore ndaje… Wampaye amaso, umpa ndetse n’urumuri, Mbasha kubona inzira, none dore ndaje…Shimirwa Nyagasani, kubera iki kivi, Nyongerera intege, mbashe kucyusa.”

Jean Paul Murara arasaba abakunzi b’indirimbo ze ko amagambo ari muri iyi ndirimbo “Ndabyemeye” bayagira ayabo.

Yagize ati: “Ndasaba abakunzi b’indirimbo zanjye ko amagambo agize Ndabyemeye bayagira ayabo, ndifuza ko aya magambo yaba aya buri wese ufite umugambi cyangwa se ikifuzo kiza yemereye Imana.”

Zimwe mu zindi ndirimbo za Jean Paul Murara zakunzwe cyane harimo “Ubuhamya”, “Umwami Nyakuratwa”, “Inyenyeri inyobora”, “I wanna live close to you” n’izindi.

Marie Clemence CYIZA UWIMANIMPAYE