Iri tsinda rigizwe n’abahanzi Kamana Richard bita Kennedy na Uwiringiyimana Ernest, bakaba baramaze kugeza muri studio indirimbo irwanya ibiyobyabwenge, ariko bavuga ko izina ryayo rizamenyekane iri hafi kujya ku mugaragaro.

Baganira na Kigali Today kuri uyu wa 23 Kanama 2013, Kennedy na Ernest bavuze ko bamaze kubona ko ingeso yo gukoresha ibiyobyabwenge ikiri mu rubyiruko rumwe na rumwe biyemeje gushyiraho akabo mu kubirwanya bivuye inyuma.

Kennedy yagize ati: "Twebwe nk’urubyiruko rw’u Rwanda twasanze nta wundi musanzu twatanga mu kurwanya ibiyobyabwenge, twiyemeza gukora indirimbo irimo ubwo butumwa, kuko biri mu bintu bituma umuntu adindira mu iterambere rye bwite n’iry’igihugu muri rusange”.

Ernest na we ati: "Tugomba gufatanya na buri wese ugira uruhare mu kwamaganira kure ikoreshwa ry’inzoga zitemewe n’urumogi, ni yo mpamvu twahimbye iyo ndirimbo kugira ngo dutange umusanzu wacu nk’abahanzi”.

Aba bahanzi bakomeza bavuga ko uku kwezi kwa Kamena kuzajya kurangira igihangano cyabo cyamaze kujya ahagaragara, kikaba gikubiyemo ubutumwa bwo kugaragaza ingaruka mbi ziterwa no gukoresha ibiyobyabwenge by’ubwoko butandukanye.

Benjamin Nyandwi