Benshi mu bakurikiranira hafi ibya muzika n’ibyamamare basanga abahanzi ndetse n’ibindi byamamare, haba mu Rwanda ndetse no mu mahanga bavuga ko abahanzi bakoresha uko bashoboye ngo bavugwe mu bitangazamakuru bityo amazina yabo ahore mu mitwe y’abakunzi babo.

Usanga akenshi abantu nk’aba b’ibyamamare inshuro nyinshi baba bafitanye ibibazo mu bitangazamakuru ariko mu buzima busanzwe ugasanga mu by’ukuri nta bibazo biri hagati yabo.

Usanga baba bashakisha inzira zose n’ibikorwa byose byatuma bavugwa rimwe na rimwe ugasanga bakoze n’ikintu kibi cyangwa se ikintu kiri butungure cyangwa kigatangaza benshi. Ibi bikaba bitera bamwe kwambara imyambaro idasanzwe n’ibindi.

Mu Rwanda rero naho ibi birahari kandi ntibikorwa gusa n’abamaze kuba ibyamamare dore ko umuhanzi wese utangiye umuziki ashakisha umuhanzi umazemo igihe bagirana ibibazo (beef) mu rwego rwo kugira ngo nawe ahite amenyekana.

Hari ubwo usanga umuhanzi yemera akibeshyera n’ibintu bikomeye atakoze mu rwego rwo kugira ngo avugwe. Hariho ndetse n’abageza aho kurwana, nabo kugira ngo bavugwe.

Ibi bituma usanga igihe kinini mu bitangazamakuru haba harimo abahanzi bafitanye ibibazo umuntu akaba yakibaza impamvu bikamuyobera.

Umuntu yakibaza ati ese koko ni ngombwa gukora nk’aho bafitanye ibibazo kugira ngo bavugwe cyane mu itangazamakuru? cyangwa byaba byiza bakoze ibikorwa byiza akaba ari byo bibahesha kuvugwa cyane?

Ese iyo wumva buri kanya abahanzi bagirana ibibazo ubifata ute?

Marie Clemence CYIZA UWIMANIMPAYE