Nk’uko King James we ubwe abitangaza, iyi ndirimbo yayikoze kubera gushimisha abafana be bahoraga bamusaba ko yabakorera indirimbo itari iy’urukundo dore ko ubusanzwe ubuhanzi bwe buganisha ku ndirimbo z’urukundo gusa.

Mu ndirimbo ye “Abubu” King James agira ati: “ ...Abubu abubu njye baranyobeye, amagambo amashyari ko mbona byugarije abantu? Uca aha, waca aha ugasanga ni bla bla bla... buri muntu ku isi afite uko abayeho ariko ugasanga rubanda bamwihaye. Ese ko ibintu byose mbona byajemo amashyari? Ibintu byiza ntibibonwa habonwa ibibi...”

Arongera akagira ati: “… waba ufite umugore wikundira bati ziriya ni inzaratsi waba uhinduriwe imirimo bati kiriya ni ikimenyane...wambara agashati keza agakweto keza bakanungunika...waba wabonye agafaranga bati uriya ni umunyamitwe, abubu bavunwa n’ubusa reka mbareke nibyinire...”.

King James kandi yongeyeho by’umwihariko ko kuyita “Abubu” ari igitekerezo cy’umwe mubafana be witwa Kaneza Innocent.

Mu magambo make aragira inama abantu ko utagombye gukora ureba ngo baragira ngo iki kuko ibyo wakora byose ab’ubu baravuga kandi ntacyo wakora ngo ntibakibonemo uko bashaka. Ukora neza bakakuvuga wakora nabi bakakuvuga.

Iyi ndirimbo “Abubu” yakozwe na Pastor P usigaye atunganyiriza indirimbo ku mugabane w’i Burayi mu gihugu cy’u Bufaransa ari naho iyi ndirimbo yarangirijwe itunganywa.

King James uherutse ku mugabane w’i Burayi, akaba bwari nabwo bwa mbere mumateka ye yuriye indege yerekeza kuri uwo mugabane, yatangaje ko yasanze abahanzi nyarwanda i Burayi bakunzwe.

King James kandi yongeyeho ko n’ubwo abafana baba batari benshi cyane nk’uko ino biba bimeze iyo umuhanzi ari kuririmba ngo baba bishimye cyane kandi bakanabyina.

Marie Clemence CYIZA UWIMANIMPAYE