Abahanzi batanu bazakomeza muri Guma Guma bazamenyekana kuwa gatandatu

24-07-2013 - 11:08' | Ibitekerezo ( )

Ku wa gatandatu tariki 27/07/2013 nibwo abahanzi batanu bazakomeza amarushanwa ya PGGSS 3 bazamenyekana mu muhango uzabera muri Serena Hotel. Muri aba ni naho hazavamo uzegukana iri rushanwa ku nshuro yaryo ya gatatu.

Mu bahanzi 11, hazatorwamo abahanzi barusha abandi gukundwa bakaba ari abahanzi bazagaragaza amanota menshi kurusha abandi yavuye mu gutorwa n’abafana ndetse n’ayo bazaba bahawe n’akanama nkemurampaka.

Muri PGGSS 3 hongewemo akanama nkemurampaka katangaga amanota ubwo buri muhanzi yaririmbaga mu buryo bw’umwimerere (Live) imbere y’imbaga y’abafana.

Batandatu muri 11 bahatanira PGGSS bazasezererwa tariki 27/07/2013.

Nubwo igihe cyo kwiyereka abafana baririmba mu buryo bwa Playback ndetse na live byarangiye, gutora byo biracyakomeza ugakomeza guha amahirwe umuhanzi wawe wifuriza gukomeza muri batanu bazakomeza kuwa gatandatu.

Guha amahirwe umuhanzi wawe ni ukwandika numero ye mu butumwa bugufi maze ukohereza kuri 4343.

Dore abahanzi 11 bahatanira PGGSS 3 na nimero zibaranga muri aya marushanwa : Dream Boys irangwa n’umubare 1, Bull Dogg arangwa n’umubare 2, Riderman arangwa na 3, Christopher afite 4, Urban Boys bafite 5, Kamichi afite 6, Senderi afite 7, Danny Nanone afite 8, Fireman afite 9, Knowless 10 naho Mico The Best akagira nimero 11.

Marie Clemence CYIZA UWIMANIMPAYE