Aya makuru yatangiye gukwira hirya no hino mu bitangazamakuru binyuranye, n’ubwo nyiri ubwite Aline Gahongayire atarabyemeza, tariki 13/01/2015 nyuma y’aho umugabo we Gabriel Gahima bivuzwe ko yaba yaratangarije urubuga rwa inyarwanda.com ko yamaze gutandukana nawe, ndetse akaba arikubarizwa mu gihugu cya Tanzaniya aho azava bidatinze aza kuzuza ibisabwa byose ngo abashe gutandukana na gahongayire byemewe n’amategeko (divorce).

Gahongayire na Gahima ku munsi w’ubukwe bwabo.

Mu magambo ye nk’uko bigaragara kuri uru rubuga, Gahima yagize ati “Njye ubwanjye amakuru nguhaye ni uko ngiye gutandukana na Aline, ibisobanuro byanjye ni uko twembi turi abana beza ariko bikaba bitagishobotse ko tubana ndetse nawe ushobora kumubaza ndetse na status yanjye kuri facebook imaze guhinduka ubu ndi separated, kandi mu minsi mike nzagaruka mu Rwanda kandi icyo gihe nzatangira ibigomba gukorwa kugira ngo ntandukane nawe”.

N’ubwo benshi batabivuzeho rumwe bamwe bemeza ko umugabo ari mu makosa kubera gushyira amabanga y’urugo mu bitangazamakuru, abandi bakemeza ko Gahongayire nawe yaba yarabigizemo uruhare mu gutandukana kwabo, abahanzi b’inshuti za Gahongayire bakomeje kumwihanganisha babinyujije mu nzira zitandukanye.

Kavutse yabwiye Gahongayire ko iyo umuryango w’ibyishimo umwe wifunze indi ifunguka.

Umuhanzi Olivier Kavutse, umwe mu bahanzi bagize itsinda rya Beauty for Ashes yatanze ubutumwa agira ati “turi kumwe nawe muri ibi bigeragezo urugo rwawe rurimo. Komera kandi wibuke ko Yesu azakuba hafi mubyo wanyuramo byose. Turagukunda kandi turagusabira. Petero wa mbere 1:6-7”.

Ezra Kwizera nawe ugenekereje yagize ati “Ibyaza byose nabyo bizahita. Ntutinye gutsindwa ngo unanirwe kugerageza ibintu bishya...wibuke ntabwo Imana izadutererana”.

Yakomeje agira ati “Iyo umuryango umwe w’ibyishimo wifunze, indi irafunguka ariko kenshi tureba cyane umuryango wakinzwe ntitubashe kubona uwadukinguriwe.

Kwizera yageneye Gahongayire ubutumwa bumukomeza.

Muvandimwe wanjye ndagukunda kandi ndagusabira ngo ibyishimo biva ku Mana bikubere imbaraga kandi na Gahima ndamusabira umugisha, ndashima ko urukundo rw’Imana rutajya rutsindwa”.

Dady de Maximo Mwicira-Mitali nawe yahumurije Gahongayire, mu ibaruwa ndende cyane ariko yuzuyemo amagambo y’ingirakamaro. Bimwe mu byo yavuze amuhumuriza yagaragaje ko asanzwe aziko akomeye k’ Uwiteka kandi ko akomeza benshi nawe arimo, bityo aramusabira gukomeza gukomera kugira ngo akomeze gukomeza benshi nawe.

Aragira ati “Mushiki wanjye kandi nshuti yanjye nkunda, Nta bwoba namba uri umunyangufu Uwiteka yaguhaye gukomera ngo ukomeze abandi ndabihamya, unyeganyeze ndahungabana, ukomeye nkomeza urugendo, inzira ni ndende ariko kubizera ngo kugenda hejuru y’amahwa ni ibintu byacu, erega turi ku Isi nta kigutegereje utamaze guhura nacyo, nta bwoba Uwo wizera Ntanyeganyezwa ahubwo mu bihe nk’ibi niho ugukomera kuva...”.

Dady de Maximo ni umwe mu bahumurije Gahongayire.

Aline Gahongayire we akomeje gutambutsa ubutumwa buhumuriza abari mu bigeragezo anabasabira, kandi nawe ku giti cye akagaragaza ko ari umunyamugisha.

Yagize ati “Ndi umunyamugisha ibihe byose...kandi ibihe byose Imana ni Nziza no mu bihe nk’ibi. Ntacyabuza umutima wanjye guhamya Imana kuko inyibukije uwo ndiwe ni uko ndi Umunyamugisha...amakuru y’impamo ni uko Yesu wanjye adakoza isoni kandi ingoma ye ntizahanguka...still nta bya none n’ibizaza bizantanya nawe...ndi umunyamugisha no kurushaho...Murakoze mwese kungaragariza urukundo. I am blessed. Jeremie 29:11”.

Yarongeye agira ati “Humura Imana ntibeshya kandi Imana ntihemuka niba hari ijambo yakuvuzeho rizasohora...numva nshaka kuguhumuriza wowe wumva ko nta cyerekezo cy’ubuzima...senga ushime kandi wizere Imana idahemuka izakunezeza...ntihazagire ikintu na kimwe kigutandukanya n’urukundo rw’Imana...ndumva nakubwira ngo humura ma..nta joro ridacya nta n’imvura idahita...komera songa mbere. Love u all”.

Ifoto ikubiyemo ubutumwa Gahima yashyize kuri Facebook kuwa 14/01/2015.

Gahima we mu butumwa yanyujije kuri facebook arasaba abantu kutamucira urubanza kuko badashobora kubasha nibura kimwe cya kabiri cy’ibyo yanyuzemo ndetse yongeraho ati “Hari impamvu nkora ibyo nkora, hari impamvu ndi uwo ndiwe”.

Gahingayire yamenyekanye cyane mu ruhando rw’abahanzi b’indirimbo zihimbaza Imana (Gospel), mu bikorwa byo kumurika imideli ndetse ubu akaba ari kugaragara mu kanama nkemurampaka mu gikorwa cyo gutora Nyampinga w’u Rwanda 2015, Ibi bibaye nyuma y’uko agize ibyago akabura imfura ye ubwo yitabaga Imana avuka mu kwezi kwa Nzeri umwaka wa 2014 ndetse ubu hari kuvugwa amakuru hirya no hino ko yaba yaramaze gutandukana n’umugabo we bashakanye tariki 20/12/2013.

Marie Clemence CYIZA UWIMANIMPAYE