Iki gitaramo kizabera mu muji wa Cape Town ahitwa Maitland Hall kizagaragaramo abahanzi nyarwanda banyuranye baba muri Afurika y’Epfo mu rwego rwo kwiyibutsa iby’iwabo.

Princess Emmeline Kaze umuhanzi akaba n’umwe mu banyarwanda bateguye bakazanitabira iki gitaramo yagize ati: “Iyi show yateguwe bitewe n’uko Abanyarwanda benshi bajya bumva ko turi abahanzi ariko ntibabashe kubona ibikorwa byacu niho batangiriye badusaba yuko twagira icyo dukora tukabereka ibihangano byacu.

Nibwo abaraperikazi Emmy Kul Kid na Empress Claudine bahisemo gutegura iki gitaramo mu buryo bwo gushimisha abantu ariko baza gusanga y’uko byaba akarusho bakubiyemo injyana zitandukanye kugira ngo buri wese abashe kwizihirwa n’izo akunda...”.

Emmy yakomeje agira ati: “... muri izo njyana bahisemo: Hip hop, RnB injyana zigezweho kandi zashimisha benshi mu rubyiruko, Gospel ku bakunzi b’indirimbo zihimbaza Imana cyane cyane, na Karahanyuze izakorwa n’umuhungu wa Mpakanyaga Abdul akaba azabibutsa indirimbo zashimishaga abakuze cyane cyane...”.

Iki kirori kizatangira saa kumi n’ebyiri z’umugoroba (18:00) aho kwinjira bizaba ari amafaranga akoreshwayo 50 (R50) ku muntu umwe naho k’uherekejwe (couple) bikaba R80. Mu myanya y’icyubahiro ni akarusho kuko ari ukwishyura R100 ugahabwa brochet n’icyo kunywa.

Claudine na Emmy bafite inzozi zo kuzageza umuziki nyarwanda mu mpera z’isi cyane cyane bahereye muri Afurika y’Epfo aho bateganya kuzajya bakomeza gutegura ibitaramo nk’iki ndetse bakaba banafite gahunda yo kuzajya banatumira abahanzi nyarwanda baba hirya no hino uhereye mu Rwanda.

Marie Clemence CYIZA UWIMANIMPAYE