Mwiseneza Josiane wabaye Nyampinga watowe nk’uwakunzwe n’abantu benshi mu irushanwa rya Miss Rwanda muri 2019 (Miss Popularity), yambitswe impeta n’umusore byacaga amarenga ko biteguraga kurushinga.

Ku mugoroba wo ku wa Gatandatu tariki 15 Kanama 2020, nibwo ku mbuga nkoranyambaga hasakaye amafoto n’amashusho magufi agaragaza Miss Josiane mu ikanzu y’igitenge, yambikwa impeta abasore basanzwe bambika abo bifuza ko bazarushingana.

Ni ibirori byari byateguwe mu buryo bubereye ijisho, mu cyumba cyari gitatse indabo, ndetse mu mashusho yafatiwe aho hantu humvikanaga amajwi y’abakobwa bavuzaga akaruru basaba Josiane kwegera imbere ngo asanganire umukunzi we aho yari apfukamishije ivi rimwe ari na byo byitwa gutera ivi.

Miss Mwiseneza Josiane yagaragaraga nk’uwari utunguwe, yegereye umukunzi we yipfutse n’ikiganza mu maso, yemera kwambara impeta yari ahawe, abari aho bakomera amashyi icyarimwe.

Icyakora abantu bakomeje gutegereza andi makuru y’urukundo rw’aba bombi ntiyongera kuboneka, ahubwo bikavugwa ko buri wese yaba asugaye afite undi bakundana.

Inkuru z’urukundo rwabo zongeye kugarukwaho nyuma y’aho uyu musore Tuyishimire Christian ashyiriye amafoto ku mbuga nkoranyambaga amugaragaza ari mu bihe byiza n’undi mukobwa, ndetse akayaherekeresha amagambo agaragaza urukundo hagati yabo bombi, ndetse ko baba barimo kwitegura kubana.

Bamwe mu babonye ayo mafoto ntibishimiye no kuba uyu musore yaba yaratandukanye na Miss Josiane, bamwe ndetse bakongeraho ko uyu musore yaba ahemukiye Josiane wari wamwemereye urukundo.

Icyakora hari n’abavuze ko uyu musore na mbere yo kwambika impeta Josiane yari amaze igihe kirekire akundana n’uwo mukobwa, dore ko amwe mu mafoto yabo bari kumwe bigaragara ko ari ayo hambere.

Turacyashakisha icyo izi mpande zombi zibivugaho...