Impala n’imparage zimaze igihe zariyemeje kuzenguruka igihugu cyose mu rwego rwo kongera kwiyereka Abanyarwanda.

Ubwo zageraga mu karere ka Muhanga mu Ntara y’Amajyepfo tariki 24-25/11/2012, Abanyamuhanga basigaye bavuga byinshi kuri iyi orchestre yubatse amataka mu Rwanda.

Impala zararirimbye abantu barabyina karahava.

Abanyamuhanga bemeza ko ari ubwa mbere itsinda ry’abaririmbyi cyangwa abaririmbyi ku giti cyabo baje muri aka karere nyuma ya Jenoside yakorewe Abatutsi bakitabirwa n’abantu benshi nk’abo Impala zabonye.

Umusaza witwa Tito wo muri aka karere ni umwe mu bitabiriye ibitaramo byakoreshejwe n’Impala uko ari bibiri; haba icyabereye mu kabari kazwi ku izina rya Orion ndetse n’icyabereye ku kazwi ku izina rya Plateau.

Nubwo hari intebe nta muntu wicaye.

Uyu musaza avuga ko ari ubwa mbere abonye abanyamuhanga bongera gususuruka nka mbere ya Jenoside kuko ngo nta bandi bahanzi bari baza muri aka karere bashiture abanyamuhanga b’ingeri zose.

Yagize ati: “Impala zatuvugishije amangambure, jye narinzi ko ibyishimo by’Abanyarwanda bitazagaruka ariko mbonye ko baburaga Impala. Nta bahanzi bari bakongera kudushimisha kuva Jenoside yaba mu Rwanda ariko Impala zirabikoze kandi si ibikabyo”.

Axone Mutoni ni umwe mu rubyiruko rukunda ibigezweho, wari witabiriye igitaramo cy’Impala ku cyumweru cyane ko iki gitaramo kitabiriwe n’ingeri zitandukanye z’abantu.

Impala n’Impalage zakoze presentation nk’iyo zakoraga cyera.

Yagize ati: “ni ubwa mbere mbonye i Muhanga hashyushye gutya, kuva zagera muri uyu mujyi hari ambiance sana, ari abashaje, urubyiruko, abana n’abamama n’abapapa wasangaga bose bahinze ngo barashaka kureba Impala kandi mbonye zaturyohereje kurusha abandi bahanzi baza muri uyu Mujyi, keretse wenda ko batageza aha PGGSS kuko yo yari ifite akantu ariko abandi barabarya”.

Abakunzi b’Impala ndetse n’Imparage bazi iza cyera banabonye iz’ubu barahamya ko kugeza ubu icyo iz’ubu ziri kubura ari ubushobozi buhagije kugirango zibashe gutera ikirenge mu cy’Impala za cyera kuko ngo usanga amajwi y’abari kuririmba ubu hari aho ajya guhurira n’aya cyera.

Mimi La Rose kuri gitari.

Abakunzi b’Impala basaba ko aba bahanzi bashaka izindi ndirimbo nshya zikoranye ubuhanga nk’ubwa cyera kugirango zikomeze zikure kandi zinabashimishe.

Gerard GITOLI Mbabazi