Imikino inyuranye usanga itezwa imbere mu rubyiruko rutuye mu mijyi cyangwa urubyiruko rugira amahirwe yo kugera mu mijyi birworoheye, ariko urubyiruko rwo mu cyaro ugasanga rucikanwa nayo mahirwe kandi rufite ubuhanga n’impano mu mikino itandukanye.

Urubyiruko rwo mu Murenge wa Gatare, Akarere ka Nyamagabe, rutangaza ko nk’urubyiruko rwo mu cyaro rubura ubuvugizi ngo rube rwazamurwa mu bijyanye n’umupira w’amaguru.

Uwitwa Claude Uwimana yagize ati “turifashije mu mupira w’amaguru ariko ikibazo tubura ubuvugizi, kugira ngo natwe tube twabasha kugera ku rwego rwo hejuru kuko biragenda bigaherera aho mu mujyi nyine, twebwe abana b’inaha ntibapfe kutwibuka wenda ngo natwe tube twakora ikipe ihaamye”.

Yakomeje avuga ko akarere kari gakwiye kujya kaza gukora n’amajonjora mu byaro nabo bagatezwa imbere nk’abandi.

Yagize ati “baramutse baduteje imbere ibintu by’umupira w’amaguru bigira agaciro kanini cyane, kuko twajya tubafasha n’abasigaye inyuma tukabazamura kuko natwe twabonye abatuzamura, kuko umupira w’amaguru warushaho guterimbere mu Rwanda ukanamamara mu mahanga”.

Umuyobozi w’Akarere ka Nyamagabe, Philbert Mugisha atangaza ko bafite ingamba zo gukangurira urubyiruko kwitabira siporo bishakamo impano kugira ngo bibateze imbere.

Yagize ati “ubu turi kugenda tuvugurura ibibuga by’umupira w’amaguru, iby’imyidagaduro itandukanye, ariko noneho tukanareba impano urubyiruko rufite, atari umupira w’amaguru gusa, ahubwo n’izindi mpano urubyiruko rwaba rufite nko gusiganwa ku magare n’amaguru”.

Akarere gakomeje gushakisha impano mu rubyiruko cyane cyane gahereye ku bari mu mashuri y’uburezi bw’ibanze bw’imyaka 9 na 12 ndetse n’urubyiruko ruri hanze y’ishuri rukazitabwaho.

Caissy Christine Nakure