Ni irushanwa ryakinwaga ku nshuro ya Kane, ryatangiye ku wa Gatandatu tariki ya 7 Kamena 2025 risozwa kuri iki Cyumweru tariki ya 8 Kamena 2025, ryaritabiriwe n’abarenga 220 baturutse mu makipe ariyo Aquatic Academy Kampala, Cercle Sportif Karongi Academy, Friends of Water Swim Club, Hertz Swim Club, Kigali Sporting Club, Mako Sharks Swim Club, Ntare Louisenlund School, Starlings Swim Club, Steers Aquatics.

Aya makipe yose yahizwe na Aquatic Academy Kampala yo muri Uganda yaryegukanye n’amanota 5,094, Mako Sharks Swim Club yariteguye iba ya kabiri n’amanota 3,098, Cercle Sportif Karongi Academy iba iya gatatu n’amanota 1,734.50, Kigali Sporting Club ifata umwanya wa kane n’amanota 1,534 mu gihe Hertz Swim Club yabaye iya gatanu n’amanota 751.50.

Bwana James Bazatsinda uyobora ikipe ya Mako Sharks itegura iri rushanwa, yavuze ko kuri iyi nshuro ryari rikomeye cyane bitewe n’urwego rwabaryitabiriye ashishikariza n’abandi gutegura amarushanwa menshi menshi kuko aribyo bizatuma urwego rw’abakinnyi b’Abanyarwanda ruzamuka binashimangirwa n’umuyobozi w’Ishyirahamwe ry’Umukino wo Koga mu Rwanda, Madamu Cynthia Munyana washimiye iyi kipe kuba itegura iri rushanwa.

Ati “Ndashimira byimazeyo ikipe ya Mako Sharks Swim Club imwe mu makipe kuba yateguye iki gikorwa, igahuza amakipe icyenda arimo atanu yo mu Rwanda n’andi yo muri Uganda nabo dushimura kubera kwitabira. Ndashaka kandi gufata uyu mwanya nshishikarize andi makipe yose yo mu Rwanda gukurikiza uru rugero rwiza.Ishyirahamwe ryacu rirahari ngo ribashyigikire mu buryo bwose bushoboka cyane cyane ubwa tekiniki igihe cyose mufashe iya mbere mu guteza imbere uyu mukino no kuwusangiza abandi."

Mu mwaka wa 2024, irushanwa ryari ryatwawe na Mako Sharks Swim Club yagize amanota 3597 ikurikirwa na Aquatic Academy Kampala yatwaye iry’uyu mwaka aho yari ifite amanota ihumbi 3590,5, Silverfin Academy yabaye iya gatatu n’amanota 1658 mu gihe Cercle Sportif de Karongi yari yabaye iya kane n’amanota 1127.