Ni shampiyona zigarutse nyuma y’uko kuva tariki 13 kugeza 21 Ugushyingo 2023 ku migabane itandukanye amakipe y’ibihugu yakinaga imikino itandukanye yo gushaka amatike yo kwerekeza mu marushanwa ahuza ibihugu mu myaka iri imbere.Shampiyona eshanu zikomeye i Burayi mu Bwongereza,u Bufaransa, u Butaliyani,Espagne n’u Budage barakina ariko amaso ahanzwe mu Bwongereza nka shampiyona ya mbere ikunzwe ariko noneho irimo n’umukino ukomeye cyane.

Uyu nta wundi ni umukino uhuza amakipe ya Man City izakira Liverpool amaze hafi imyaka umunani ariyo asa nkaho ahanganiye cyane ibikombe bya shampiyona muri iki gihugu dore ko kuva mu mwaka w’imikino wa 2016-2017 kugeza ariyo yabigabanye. Muri iyo myaka hakinwe ibikombe birindwi bya shampiyona Man City yatwayemo bitandatu naho Liverpool itwaramo kimwe.

Amateka y’umukino uhuza Man City na Liverpool muri shampiyona kugeza ubu:

Man City n’ikipe ya Liverpool mu mateka ya shampiyona y’u Bwongereza zimaze guhura inshuro 52 mu mateka yazo aho muri iyo mikino Liverpool ariyo yatsinzemo myinshi 21 naho Man City yatsinze 12 amakipe yombi anganya imikino 19. Mu mikino 12 Man City yatsinze icumi muri yo yayitsindiye mu rugo iranakirira Liverpool mu gihe yayisuye yatsinze imikino ibiri gusa.

Liverpool mu mikino 21 imaze gutsinda Man City muri rusange,imikino yayitsinze iyisanze iwayo nkuko biraba bimeze kuri uyu wa Gatandatu ni ine gusa mu gihe indi yose 17 yayitsindaga yayakiriye Anfield.

Amateka ya vuba hagati ya Man City na Liverpool:

Ikipe ya Liverpool irasura Man City,mu mikino 14 iheruka guhuza amakipe yombi muri shampiyona yasuye yatsindiye kwa mukeba umukino umwe gusa tariki 21 Ugushyingo 2015 ihatsindirwa umunani inganyirizayo itanu. Uku kutitwara neza yasohotse biranajyana no kuba uyu mwaka mu mikino itatu yikurikiranya iheruka gusohoka muri rusange muri shampiyona itari yabonamo intsinzi nimwe dore ko yatsinzwemo rimwe ikanganya kabiri.

Nubwo bimeze gutyo ariko Liverpool mu mikino 23 iheruka gukina muri shampiyona kuva mu mwaka w’imikino uheruka 2022-2023 yatsinzwe umukino umwe itsinda 17 inganya itanu.1/3 cy’ibitego Man City imaze gutsindwa muri shampiyona uyu mwaka cyabonetse mu mukino umwe baheruka kunganya na Chelsea 4-4 byari ubwa mbere binjijwe ibitego bine cyangwa birenga mu mukino umwe kuva batsindwa na Leicester City 5-2 mu 2020.

Uyu mukino ugiye kuba amakipe yombi ari mu myanya ibiri ya mbere muri shampiyona y’u Bwongereza aho Man City iri ku mwanya wa mbere n’amanota 28 mu gihe Liverpool ari iya kabiri n’amanota 27.Aya makipe agiye gukina ku nshuro ya kane hagati yayo ariyo ari mu myanya ibiri ya mbere ya shampiyona.

Abatoza Jurgen Klopp wa Liverpool na Pep Guardiola wa Man City mu mateka yabo bagiye guhura ku nshuro ya 29 mu gihe inshuro 28 baheruka Klopp ariwe watsinze nyinshi(11) Pep Guardiola atsinda icumi banganya imikino irindwi. Jurgen Klopp niwe mutoza umaze gutsinda inshuro nyinshi Pep Guardiola mu bandi batoza bose.

Umukino uheruka guhuza amakipe yombi muri shampiyona wabaye tariki 1 Mata 2023 maze Man City itsinda ibitego 4-1.Nubwo yatsinze uyu mukino ariko Man City iheruka gutsinda imikino ibiri yikurikirana ya shampiyona ikina na Liverpool ubwo yatsindaga imikino ine(4) hagati y’i 1935 n’i 1937.

Ku bakinnyi ku giti cyabo rutahizamu Erling Haaland umaze gutsinda ibitego 48 mu mikino 47 ya shampiyona amaze gukina,ikipe ya Liverpool na Brentford niyo makipe kugeza ubu atari yatsinda igitego mu gihe abura ibitego bibiri ngo yuzuze 50 ,aho aramutse abibonye kuri uyu wa Gatandatu yakora amateka yo kuzuza ibitego 50 mu mike agaca agahigo gafitwe na Andrew Cole wabyujuje mu mikino 65.

Amakuru avugwa mu makipe:

Ikipe ya Man City izakira umukino ifite ikizere cyo kuzaba ifite abakinnyi bayo bari bagiriye ibibazo mu makipe y’ibihugu barimo Erling Haaland,Ederson,Nathan Ake ariko bakoze imyitozo ejo kuwa Kane.Gusa iyi kipe irakina idafite Mateo Kovacic,Matheus Nunes,Sergio Gomez bose bafite imvune kongeraho Kevin de Bruyne uzagaruka mu mpera z’umwaka wa 2022.

Abashobora kubanza mu kibuga: Ederson; Kyle Walker,Ruben Dias, Gvardiol, Akanji; Rodri, Silva; Jack Grealish, Julian Alvarez,Phil Foden;Erling Haaland

Ku rundi ruhande ikipe ya Liverpool ejo kuwa kane abakinnyi nka Ibrahima Konate,Joe Gomez ,Ryan Gravenberch ndetse na Curtis Jones bakoze imyitozo nyuma yo gusiba umukino waheruka guhuza iyi kipe na Brentford mbere yo kujya mu karuhuko.

Abashobora kubanza mu kibuga: Alisson Becker; Trent Alexander-Arnold, Joel Matip,Virgil Van Dijk, Joe Gomez; Alexis Mac Allister,Curtis Jones, Dominik Szoboszlai; Mohamed Salah, Darwin Nunez,Luis Diaz.
Uyu mukino uteganyijwe ku isaha ya saa munani n’igice ukaba urasifurwa n’umusifuzi Chris Kavanagh.