Uyu mukino wabereye kuri Stade y’Akarere ka Ngoma mu Ntara y’Iburasirazuba, witabirwa n’abaturage ndetse n’abayobozi batandukanye mu nzego z’ibanze ndetse n’ab’Ingabo ku mpande z’ibihugu byombi. Ubuyobozi bwa RDF bwari buhagarariwe na Brig Gen Frank Mutembe.

Uyu mukino watangiye amakipe yombi anganya ibitego 2-2, haza kwitabazwa penaliti kugirango hamenyekane uwegukana intsinzi, maze Brigade ya TPDF 202 yegukana intsinzi kuri penaliti (5 – 4).

Mu ijambo rye nyuma y’uyu mukino, Col Justus Majyambere, Umuyobozi wa diviziyo ya 5 mu ngabo z’u Rwanda RDF, yavuze ko RDF na TPDF bishimira ibikorwa bitandukanye biranga ubufatanye hagati y’Ingabo z’ibihugu byombi.

Col Majyambere yashimangiye kandi ko gutegura uyu mukino w’umupira w’amaguru wa gicuti ari ubundi buryo bwo kuzamura umubano usanzweho ndetse no kubaka ikizere hagati y’ingabo z’u Rwanda n’iza Tanzaniya.

Aganira n’itangazamakuru, Col Ramadhan Athuman Dogoli, Umujyanama mu bya gisirikare muri ambasade ya Repubulika yunze ubumwe ya Tanzaniya mu Rwanda yashimye umubano mwiza ugaragara hagati ya TPDF na RDF, agaragaza ko ushimangira ubufatanye bwiza mu bijyanye n’amahugurwa ndetse n’ibikorwa, cyane cyane mu gukorera hamwe mu gusigasira umutekano ku mupaka uhuriweho n’ibihugu byombi.

Mbere y’uyu mukino w’umupira w’amaguru, amakipe yombi kandi yabanje kwitabira igikorwa cy’umuganda aho bifatanyije n’abaturage bo mukarere ka Ngoma, umurenge wa Kibungo.