Kuri Kigali Pelé Stadium habereye imikino ibiri. Saa cyenda Gasogi United yari yakiriye Amagaju FC. Ikipe y’Amagaju FC yifuzaga gutsinda ikaguma mu myanya y’imbere yabigezeho ibifashijwemo na Rukundo Abdul Rahman wayitsindiye igitego ku munota wa 45 kuri kufura nziza yateye.

Ikipe ya Gasogi United itari yabanjemo abarimo Malipangu Theodore, rutahizamu Ravel Djoumeku na Niyitegeka Idrissa yabashyizemo ngo bishyure ariko biba iby’ubusa, umunyezamu Ndikuriyo Patient afasha Amagaju FC cyane, umukino urangira inatsinze igitego 1-0 iguma ku mwanya wa gatatu n’amanota 13.

Saa kumi n’ebyiri kuri iyi stade, Ikipe ya Kiyovu Sports yakiriye Marine FC maze ibifashijwemo na Mugunga Yves ku munota wa 28 w’umukino atsinda igitego maze igice cya mbere kirangira ari 1-0. Mu gice cya kabiri Kiyovu Sports yakomeje gukina neza. Ku munota wa 76, Iracyadukunda Eric wari usimbuye, yazamukanye umupira ibumoso maze awuhinduye, Brian Kalumba atsinda igitego n’umutwe.

Ku munota wa 86 w’umukino, Marine FC yabonye igitego kimwe ubwo Mbonyumwami Thaiba yahabwaga umupira abakinnyi ba Kiyovu Sports bagacyeka ko yaraririye ariko bitari byo maze awurenza umunyezamu Nzeyirwanda Djihad na we wabitekerezaga gutyo, umukino urangira Kiyovu Sports itsinze Marine FC 2-1, Kiyovu Sports igira amanota 12 ifata umwanya wa kane.

Nyuma yo guterwa mpaga mu mukino uheruka, ikipe ya Etincelles FC yagiye gutsindira Sunrise FC iwayo igitego 1-0 cyatsinzwe na Ciza Hussein ku munota wa 90. Bugesera FC iheruka kunganyiriza na APR FC i Kigali yongeye kunganya na Gorilla FC mu rugo ibitego 2-2.

Iradukunda Simeon ku munota wa 50 na Cedric Mavugo ku munota wa 93 batsindiye Gorilla FC yujuje imikino irindwi idatsinda umukino n’umwe kuko yanganyije itandatu(6) itsindwa umwe(1) mu gihe Stephen Bonney ku munota wa 36 na Ani Elijah ku munota wa 89 batsindiye Bugesera FC.

Kuri iki Cyumweru:

AS Kigali irakina na Police FC
Musanze FC irakina na Rayon Sports
Etoile de l’Est irakina na Muhazi United