Ni irushanwa rwatangiye ku wa 14 Kamena 2025, ritegurwa mu rwego rwo gufasha abakinnyi kugumana urwego ndetse no gufasha abashakisha amakipe kuba bakoroherwa no kuyabona.Ku wa Mbere tariki 16 Kamena 2025 nibwo ikipe y’abakinnyi bakomoka i Rubavu "Brazil " irimo abakinnyi basanzwe bakomeye bakomoka muri aka gace kazwiho ruhago, yakinaga umukino wayo wa mbere. Ku munota wa 15 w’umukino Niyonkuru Sadjati yahaye umupira mwiza Ishimwe Djabilu bakinana muri Etincelles FC abatsindira igitego cya mbere.

Elevator Gatsibo nayo irimo abakinnyi nka Manishimwe Djabel yakinaga umupira mwiza, ku munota wa 33 yabonye igitego cyo kwishyura gitsinzwe na Niyigena Shawal, igice cya mbere kirangira amakipe yombi anganya igitego 1-1. Mu gice cya kabiri, ku munota wa 58 w’umukino Brazil y’i Rubavu ibifashijwemo na Bobo Sultan usanzwe akinira Marine FC wazamukanye umupira hagati mu kibuga, agatera ishoti rikomeye ari hanze y’urubuga rw’amahina yabonye igitego cya kabiri.

Ni umukino wakomeje kuryohera abari bari kuri Tapis Rouge i Nyamirambo kuko impande zombi zerekanaga umukino uryoheye ijisho. Brazil y’i Rubavu yakomeje kujya imbere maze binyuze ku ishoti Ishimwe Ganijuru Elie ukinira Vision FC yateye, umunyezamu wa Elevator Gatsibo akarikuramo, Ishimwe Djabilu ayitdindira igitego cya gatatu. Mbere y’uko umukino urangira, ku munota wa 83, Elevator Gatsibo yabonye igitego cya kabiri cyatsinzwe na Munyaneza Etienne, gusa ntibashobora kubona icya gatatu, umukino urangira abakinnyi bakomoka i Rubavu batsinze ibitego 3-2.

Muri uyu mukino Ishimwe Djabilu watsinze ibitego bibiri niwe wahembwe nk’umukinnyi mwiza w’umukino. Mu yindi mikino yabaye, ikipe yiganjemo abakinnyi baturuka i Burundi, Buja City yatsinzwe na Stella FC yiganjemo abakinnyi bakina mu Rwanda ibitego 5-2, Habimana Yves usanzwe akinira Rutsiro FC ahembwa nk’umukinnyi mwiza w’umukino.

Mu mikino yabaye ku munsi wa mbere, tariki 14 Kamena 2025, ikipe ya Travel Line yatsizwe na Native Sports ikinamo Nshimiyimana Yunusu wa APR FC ibitego 3-1 birimo bibiri by’uyu myugariro, Golden Generation itsinda Dream Team ibitego 4-0 byatsinzwe na Hakim Hamiss ukinira Gasogi United na Salim Saleh watsinze bitatu.

Kuri uyu wa Kabiri, hateganyijwe imikino itatu aho Golden Generation irakina na Young Boys ,saa yine n’igice, Start Morning ikine na Kamonyi SDT saa saba mu gihe Ubumwe Hotel irakina na Santos saa cyenda n’igice, imikino yose irabera kuri Tapis Rouge i Nyamirambo.