Iri rushanwa ritegurwa n’ishyirahamwe ry’umukino wa Volleyball mu Rwanda (FRVB) rizitabirwa n’amakipe ane ya mbere mu bagabo ariyo APR VC, Kaminuza y’u Rwanda, Lycee de Nyanza na INATEK. Mu bagore rizitabirwa na APR VC, Ruhango, Rwanda Revenue Authority (RRA) na GS Saint Aloys y’i Rwamagana.

Mu rwego rwo gushakamo amakipe abiri azakina umukino wa nyuma, kuri uyu wa gatandatu tariki 20/10/2012 amakipe yose uko ari ane azahura hagati yayo (mini championnat) mu bagabo ndetse no mu bagore.

Muri ayo majonjora, abagabo bazakinira kuri stade ntoya i Remera, naho abagore bakinire ku kigo cyurubyiruko cya Kimisagara.

Amakipe abiri azaba yabaye aya mbere mu bagabo ndetse n’abiri ya mbere mu bagore ni yo azakina umukino wa nyuma ku cyumweru tariki 21/10/2012 kuri Stade ntoya i Remera.

Umukino wa nyuma w’abagore uzakinwa kuva saa munani z’amanywa, ukazakurikirwa n’uw’abagabo uzaba guhera saa kumi.

Nyuma y’iyi mikino ya Carré d’As nibwo FRVB izatanga ku mugaragaro ibikombe ndetse n’ibihembo ku makipe ya APR VC y’abagabo n’iy’abagore zatwaye igikombe cya shampiyona.

Irushanwa rya Carré d’AS riterwa inkunga na SORAS, uyu mwaka ikaba yaratanze miliyoni ebyri z’amafaranga y’u Rwanda.

APR VC mu bagabo na Rwanda Revenue Authority (RRA) mu bagore nizo zegukanye igikombe cya Carré d’AS giheruka.

Theoneste Nisingizwe