Nubwo ikipe y’u Rwanda itozwa na Paul Bitok yatsinze Fenerbahce ariko zakinnye umukino ukomeye ku mpande zombi kuko iseti ya mbere yarangiye u Rwanda rutsinze amanota 25-18, iya kabiri irangira u Rwanda rutsinze amanota 25-22, naho iya gatatu u Rwanda ruyitsinda ku manota 25-23.

Umutoza w’ikipe y’u Rwanda avuga ko n’ubwo batsinze bagifite byinshi byo gukosora mbere yo kujya mu gikombe cy’isi.

Ati “Uyu munsi abakinnyi banjye bakinanye imbaraga tubasha gutsinda n’ubwo twakinaga n’ikipe ikomeye. Gusa abakinnyi banjye baracyafite amakosa yo kugarira nabi (block) ndetse no gutanga imipira (service) ariko tugiye kubikosora ku buryo tuzajya mu gikombe cy’isi tumeze neza”.

Ikipe y’u Rwanda yakomeje imyitozo kuri uyu wa mbere, ikazongera gukina umukino wo kwishyura na Fenerbahce ku wa kabiri tariki 13/08/2013.

Mu gikombe cy’isi kizabera muri Turukiya kuva tariki 22/08/2013, u Rwanda ruzaba ruri mu itsinda rimwe na Reta Zunze Ubumwe za Amerika, Tuniziya na Canada.

Umukino wa mbere u Rwanda ruzakina tariki 22/8/2013 saa sita z’amanywa, ruzahura na Reta Zunze ubumwe za Amerika.

Ikipe y’u Rwanda y’abatarengeje imyaka 21 igiye mu gikombe cy’isi, nyuma y’iya barumuna babo batarengeje imyaka 19 bagiye mu gikombe cy’isi muri Mexique ariko ntibabasha gutsinda umukino n’umwe, bahita basezererwa.

Theoneste Nisingziwe