Volleyball: REG VC na KIREHE zabonye itike ya 1/2 mu irushanwa rya Gisagara Tournament

Yanditswe na

Amon B. Nuwamanya

5-12-2021 - 01:44' | Ibitekerezo ( )

Kuri uyu wa Gatandatu i Gisagara ho mu majyepfo hatangiriye irushanwa ngarukamwaka rizwi nka Gisagara Tournament, aho REG na Kirehe ziri mu makipe yabonye itike ya 1/2.

Nyuma yo kumara umwaka iri rushanwa risanzwe ritegurwa n’ikipe ya Gisagara VC ridakinwa kubera icyorezo cya Covid-19, guhera kuri uyu wa Gatandatu abakunzi b’uyu mukino bongeye kurikurikirana.

Ni irushanwa ryitabiriwe n’amakipe 12 mu byiciro byombi abagabo n’abagore basanzwe bakina icyiciro cya mbere n’ubwo amakipe yose atitabiriye kuko nk’ikipe za APR na IPRC ya Kigali z’abagore ntizigeze zitabira iri rushanwa.

Mu gitondo cyo ku wa Gatandatu tariki 04/12/2021 ni bwo imikino yatangiraga aho abagabo bakiniye mu karere ka Gisagara naho abagore bakinira mu nzu y’imikino ya Kaminuza y’u Rwanda ishami rya Hiye.

Mu mikino y’abagabo habayemo gutungurana ugeereranyije n’irushanwa ry’abasora neza ryabaye mu mpera z’Ugushyingo uyu mwaka. Kumwe mu gutungurana kwabaye ni nk’aho amakipe ya REG VC na KIREHE VC zari zasezerewe mu matsinda ubu zaraye zikatishije tike ya 1/2 ikinwa kuri iki Cyumweru.

Ikipe ya REG yari mu itsinda rya B aho yari kumwe na APR VC, IPRC ngoma na Gisagara Vc. REG mu mikino itatu yakinnye yatsinzemo 2 itsindwa umwe, ari nabyo byayihaye tike bidasubirwaho yo gukina imikino ya kimwe cya kabiri.

KIREHE VC yari mu itsinda rimwe na Unite volleyball club yahoze yitwa UTB ndetse na Kigali Volleyball Club(KVC), kirehe yahise izamuka ari iya kabili nyuma yo gutsinda ikipe ya KVC amaseti 3 ku busa, mu gihe UVC yayoboye itsinda Kuko nta mukino numwe yatakaje.