Kuri uyu wa mbere tariki 01 Mata 2019 nibwo aya marushanwa atangira imikino yose ikazabera i Cairo mu murwa mukura wa Misiri. Ni ubwa mbere Gisagara Volleyball Club yitabiriye aya marushanwa nyafurika agiye kuba ku nshuro ya 38.

Gisagara Volleyball Club na Uganda Christian University ziracakirana saa cyenda z’amanywa ku isaha yo mu Rwanda. Aya makipe yombi ari mu itsinda rimwe rya kabiri aho ari kumwe na Smouha yo mu Misiri, Gendarmerie yo muri Madagascar na Etihad yo muri Libya.

Umukino wa kabiri muri iri tsinda Gisagara izawukina ejo ku wa kabiri saa kumi za nimugoroba na El Etihad yo muri Libya ikurikizeho Smouha yo mu Misiri, ku wa gatatu isoreze imikino yo mu itsinda kuri Gendarmerie yo muri Cameroun ku wa gatandatu.

Ikipe yo mu Rwanda iheruka kwitabira aya marushanwa ni INATEK yashoje ku mwanya wa 11 muri 2017 mu gihe umwaka ushize nta kipe yo mu Rwanda yakinnye nyuma y’aho Gisagara yagombaga gukina yangiwe kwitabira kubera gutinda kwiyandikisha.

Amakipe abiri ya mbere mu matsinda ane ni yo azakomeza muri ¼.

Aya ni yo matsinda ane agize irushanwa:

Itsinda A: Ahly (Egypt)- Injis (Ivory Coast )- Police 6 (Botswana)- Mugher (Ethiopia)- Ahly Tripoli (Libya)

Itsinda B: Smouha (Egypt)- Gisagare (Rwanda)- Christian (Uganda)- Gendarmarie (Madagascar)- Etihad (Libya)

Itsinda C: Swehly (Libya)- Rukinzo (Burundi)- Woliata (Ethiopia)- Prisons (Kenya)- Espoire (Congo)- FAP (Cameroon)

Itsinda D: GSU (Kenya)- University (Zimbabwe)- AS Fag (Guinea)- Mwangaza (Congo) - Nemostars (Uganda) -Asaria (Libya)

Ikipe ya Smouha iri mu itsinda rimwe na Gisagara ihagarariye u Rwanda ni imwe mu makipe akomeye aho yegukanye umwanya wa gatatu umwaka ushize no muri 2016 mu gihe muri 2015 yasoje iri ku mwanya wa kane.

Amakipe amaze gutwara igikombe byinshi muri aya marushanwa:

Ahly (Egypt): 13
CS Sfax (Tunisia): 6
Zamalek (Egypt): 5
Espérance (Tunisia): 4
Club Africain (Tunisia): 3
Etoile du Sahel (Tunisia): 2
Mouloudia (Algeria) 2 Nasr
Hussein Day (Algeria): 1
Al Guish (Egypt): 1