Bwa mbere Gisagara VC yegukanye Memorial Rutsindura, UVC yongera guhigika ibigugu (Amafoto)

Yanditswe na

Amon B. Nuwamanya

20-06-2022 - 07:00' | Ibitekerezo ( )

Ku Cyumweru tariki 19 Kamena 2022, mu Ntara y’Amajyepfo mu Karere ka Huye mu Iseminari nto yo ku Karubanda (Petit Seminaire Virgo Fidelis), hasojwe irushanwa ryo kwibuka Alphonse Rutsindura wari umwarimu n’umutoza wa Volleyball muri iryo shuri, wishwe muri Jenoside yakorewe Abatutsi muri Mata 1994.

Gisagara VC ni yo yegukanye Memorial Rutsindura.

Ni irushanwa ngarukamwaka riba ku bufatanye bw’ikigo cya Petit Seminaire Virgo Fidelis n’ihuriro ry’abize muri iryo shuri (ASEVIF).

Amakipe ya Gisagara VC Club na UVC VC ni yo yegukanye ibikombe mu cyiciro cy’abakina nk’ababigize umwuga (Serie A), ari na cyo cyiciro cyonyine kibamo abagore mu gihe mu bindi byiciro ari abagabo.

Mu cyiciro cya kabiri cyiganjemo amakipe y’amashuri yisumbuye na za kaminuza, ikipe ya Christ Roi ni yo yegukanye igikombe itsinze Petit Seminaire Virgo Fidelis amaseti 3-2. Mu cyiciro cy’amashuri abanza, igikombe cyegukanywe na Groupe Scolaire Kigeme itsinze École Primaire Mugombwa ku mukino wa nyuma. Mu cyiciro rusange cy’amashuri yisumbuye (O’ level) igikombe cyegukanywe na Groupe scolaire Officiel Butare itsinze Petit Seminaire amaseti 3-0. Naho mu cyiciro cy’abakanyujijeho, ikipe ya Relax ni yo yegukanye igikombe itsinze Umucyo ku mukino wa nyuma.

Dusenge Wicklif na Emmanuel bagerageza guhagarika Niyogisubizo Tyson wa Gisagara VC

Ikipe ya Gisagara Volleyball y’umutoza Nyirimana Fidele, yegukanye iri rushanwa ku maseti 3-2 bikaba inshuro yayo ya mbere kuva itangiye kurikina, kuko ryari ryarihariwe na REG VC aho yari ibitse iki gikombe inshuro 3.

REG VC itahiriwe ku mukino wa nyuma, yatangiye neza umukino aho n’umutoza wayo Marshal Kwizera yari yakoze impinduka mu ikipe ye, ugendeye ku ikipe yatwaranye na yo igikombe cya GMT mu byumweru bibiri bishize, aho yari yagaruye Murangwa Nelson na Sibomana Jean Paul ndetse banitwaye neza n’ubwo bategukanye igikombe.

UVC ni yo yegukanye igikombe mu bagore itsinze APR VC

REG VC yatsinze iseti ya mbere ku manota 25 kuri 21 ya Gisagara VC, iseti ya 2 yegukanywe na Gisagara VC ku manota 25 kuri 15. Iseti ya 3 yaje kwegukanwa nanone na REG VC yari ibaye iya 2 kuri yo, gusa ntiyitwara neza mu iseti ya 4, aho yegukanywe na Gisagara VC, maze banganya amaseti 2 kuri 2, kuko iseti ya nyuma Gisagara yayitsinzwe ku manoata 25 kuri 23.

United Volleyball Club (UVC) yahoze ari UTB yongeye kwegukana igikombe nyuma ya Gisagara Tournament yatwaye mu ntangiriro z’uyu mwaka, yegukanye igikombe itsinze APR VC ku mukino wa nyuma amaseti 3-1 .

Munezero wa APR ashakisha inzira y'aho yanyuza umupira

Rutsindura Alphonse yavutse mu 1958 i Ndora mu Karere ka Gisagara, yiga amashuri yisumbuye muri Seminari nto ya Karubanda, amashuri makuru ayakomereza muri IPN (Institut Pédagogique National) i Butare.

Yabaye umwarimu w’umuziki n’ikilatini mu Iseminari, aba umusifuzi n’umutoza w’ikipe ya Seminari kuva 1983-1994, aba umutoza mukuru w’ikipe y’Igihugu y’abagore mu 1988-1990. Yanabaye Visi Perezida wa Federasiyo ya Volleyball (FRVB), aba n’umutoza wa Rayon Sports VC mu mwaka wa 1990.

Rutsindura yishwe muri Jenoside yakorewe Abatutsi mu 1994 hamwe n’umugore we Mukarubayiza Verena n’abana be batatu, Iriza Alain, Izere Arsene na Icyeza Alida.