Irushanwa ntago ryabaye kuko ryaje kuburizwamo na polisi y’igihugu ibisabwe n’umuyobozi w’akarere ka Huye nubwo Rurangirwa yandiye asaba ubuyobozi bwa Huye ko azakoresha irushanwa ndetse akabyemererwa.

Nyuma y’urwandiko rwa Rurangirwa rusaba gukoresha amarushanwa, umuyobozi w’akarere ka Huye yaje kongera kubona urwandiko ruturutse ku muyobozi wa komite y’agatenganyo, Lt Rutsinga, avuga yuko mu izina rya federation hamwe na minisiteri y’umuco na siporo batemera ko iryo rushanwa riba kubera ko uwariteguye atemewe.

Byabaye ngombwa ko hitabazwa polisi kuko Rurangirwa we yavugaga ko irushanwa byanga bikunda riri bube. Abapolisi bakoze akazi kabo ntawe bahutaje maze ahari kunyura abasiganwaga hahagararamo abapolisi, abakinnyi babuze uko babigenza baritahira.

Ubwo twandikaga iyi nkuru, umuyobozi w’ishuri rya Gatagara, Frere Kizito, ushinzwe sitade Kamena yavugaga ko agiye kurega kuko ngo Sitade Kamena yavogerewe nyamara yari yayihaye Rurangirwa Louis.

Rurangirwa we avuga ko agiye kwandikira ishyirahamwe ry’imikino ngororamubiri ku isi abamenyesha ibyabaye.

Ishyirahamwe ry’imikino ngororamubiri mu Rwanda ryagaragaye mo amakimbirane hagati y’ubuyobozi aho Rurangirwa yemeza ko ariwe muyobozi wemewe mu gihe hari komite y’agateganyo iyobowe na Lt Kayitsinga.

Védaste Nkikabahizi