Hatangajwe ibizaranga Kigali International Peace Marathon izaba mu buryo budasanzwe

Yanditswe na

Sammy Imanishimwe

17-04-2021 - 08:25' | Ibitekerezo ( )

Isiganwa mpuzamahanga ryitiriwe amahoro rigiye kuba ku nshuro ya 16, rizakinwa mu buryo budasanzwe hubahirizwa ingamba zo kwirinda icyorezo cya Coronavirus

Ku nshuro ya 16, mu mujyi wa Kigali hazabera Isiganwa “Kigali International Peace Marathon” aho umwaka ushize ryagiye risubikwa inshuro zitandukanye kubera icyorezo cya Coronavirus.

Visi Perezida wa RAF ushinzwe amarushanwa n’iterambere, Ndekezi Omer yatangaje ko iri siganwa rizaba rigizwe n’ibikorwa bibiri ari byo Isiganwa rya nijoro rizwi nka Night Run rizaba tariki 11/06, hakaba n’isiganwa nyirizina rizaba tariki 20/06/2021.

Muri Kigali Arena mu muhango wo gutangiza imyiteguro ya Kigali International Peace Marathon

Kuri uyu wa Gatanu muri Kigali Arena, hatangirijwe ku mugaragaro ibikorwa byo gutangiza imyiteguro y’iri siganwa, ndetse hanatangazwa ibizaranga iri siganwa rizakinwa mu gihe icyorezo cya Coronavirus gikomeje kwibasira isi

Ni isiganwa rizaba rifite umwihariko

Isiganwa rigiye kumara imyaka itanu ridatangirira cyangwa ngo risorezwe kuri Stade Amahoro

Uyu mwaka isiganwa ntirizatangirira kuri Stade Amahoro

Mu gihe byari bimenyerewe ko isiganwa ritangirira kuri Stade Amahoro rikaba ari naho risorezwa, uyu mwaka ndetse n’indi myaka ine iri imbere rizatangirira kuri Kigali Arena, rikazaba ari naho rizasorezwa, zimwe mu mpamvu zikaba zirimo ko iyi Stade ishobora kuzaba iri kuvugururwa

Visi Perezida wa RAF ushinzwe amarushanwa n'iterambere Ndekezi Omer, ni we wasobanuye uko isiganwa ry'uyu mwaka riteye

Kubahiriza amabwiriza yo kwirinda iki cyorezo

Mu rwego rwo kwirinda icyorezo cya Coronavirus ndetse no kubahiriza ingamba zo kuyirinda, Perezida w’ishyirahamwe ryo gusiganwa ku maguru (RAF) Mubirigi Fidele yatangaje ko bateganyije uburyo abasiganwa bashobora kuzagenda bahaguruka mu byiciro mu rwego rwo kwirinda kwegerana ari benshi.

Kugeza ubu hateganyijwe ko buri mukinnyi uzitabira isiganwa agomba kubanza kwipimisha COVID-19, gusa bikazaterwa n’inama bazagirwa n’inzego z’ubuzima bitewe n’uko icyorezo kizaba gihagaze mu gihugu.

Abakinnyi bazwi ku rwego mpuzamahanga

Hari abakinnyi bazwi ku rwego mpuzamahanga bazitabira iri siganwa bataratangazwa, gusa mu irushanwa rya 2019 hari hatangajwe ko abakinnyi nka Usain Bolt ndetse, Mo-Farah ndetse n’umugore Tirunesh Dibaba Kenene ariko birangira batutabiriye.

Perezida wa RAF Mubiligi Fidele yanavuze ko kuba iri siganwa rizahurirana n’inama mpuzamahanga ya CHOGM, kizaba ari ikimenyetso cyiza ko mu Rwanda hakiri ubuzima n’ubwo isi yibasiwe n’icyorezo cya Coronavirus

Kugeza ubu abifuza kwitabira iri siganwa batangiye kwiyandikisha banyuze ku rubuga rwa Interineti rw’iri siganwa, aho ibiciro byo kwiyandikisha ari amadorari 30 ku munyamahanga, amadorari 10 ku baturuka muri Afurika y’i Burasirazuba (EAC), Ibihumbi bitanu ku munyarwanda na 2000 ku muntu usiganwa mu batarabigize umwuga.