Umukino w’amagare ni umwe muyo u Rwanda ruzitabira i Gaborone.

Muri iyo mikino ya Gaborone izatangira ku wa gatatu tariki 22/5/2014, u Rwanda ruzahagararirwa n’abakinnyi 41 bakina imikino 11 irimo Boxe, volleyball, gusiganwa ku maguru, Basketball ikinwa n’abakinnyi batatu (3 on 3), gusiganwa ku magare, Fencing (gukinisha inkota), Golf, Karate, Tennis, Tennis yo ku meza (Ping Pong) na Taekwondo.

Ni ku nshuro ya kabiri iyi mikino nyafurika y’Urubyiruko igike kuba nyuma ya Rabat muri Maroc muri 2010, ubundi hakaba harakinwaga imikino nyafurika ariko ikitabirwa n’abakinnyi bakuze gusa.

Mu mukino wa Taekwondo naho u Rwanda ruzahagararirwa.

Imikino nyafurika y’urubyiruko y’uyu mwaka, izitabirwa n’abakinnyi basaga 2500 baturuka mu bigugu bya Afurika 54, hakazakinwa ubwoko bw’imikino 20.

Iyi mikino izasozwa tariki 31/5/2014, ikinwa inshuro imwe mu myaka ine, ikaba yarashyizweho muri 2006 n’umuyobozi w’impuzamashyirahamwe ya za Komite Olympique muri Afurika Lassana Palenfo, ariko amarushanwa nyirizina atangira muri 2010.

Ingimbi z’u Rwanda muri Volleyball zitezweho kuzitwara neza i Gaborone.

Ubwo iyo mikino yakinwaga bwa mbere muri Nyakanga 2010 i Rabat muri Maroc, igihugu cya Tunisiya nicyo cyegukanye imidari myinshi.

Abakinnyi bazitwara neza i Gaborone, bazahavana itike yo kuzitabira imikino Olympique y’Urubyiruko izabera i Nanjing mu Bushinwa kuva tariki ya 16/8/2014.

Theoneste Nisingizwe