Iri rushanwa ryahuje abakinnyi basga 100 bakina Table Tennis ku mugabane wa Afurika, ryegukanywe n’abanya-Misiri mu bagabo no mu bagore.

U Rwanda rwari rwaserukanye abakinnyi bari mu byiciro byose uko ari 2, yaba abakina ku giti cyabo ndetse n’abakina nk’ikipe gusa.

Ku ruhande rw’abagabo, urugendo rwabo ntirwagenze neza kuko haba mu bakina ku giti cyabo ndetse n’abakina nk’ikipe, nta mudari babonye kuko batahanye umwanya wa 5 mu makipe (ibihugu 15), umusaruro utari mwiza ugendeye ku wo babonye umwaka ushize wa 2022, kuko mu marushanwa nk’aya, Didier Hahirwabasenga yari yagarukiye muri 1/8.

Mu cyiciro cy’abagore ikipe y’Igihugu y’u Rwanda yari igizwe na Tumukunde Hervine, Tuyikunde Thamal na Twizerane Regine, yacyuye umudali w’umuringa nyuma yo kugera muri ½ mu bakina nk’ikipe, aho muri uyu mukino wa Tennis yo ku meza uhita uhabwa umudari w’umuringa (Bronze), kabone n’iyo watsindirwa ku mwanya wa 3. Ku bagore bakina umuntu ku giti cye ho ntabwo babashije kurenga amatsinda.

Nyuma yo kugera i Kigali, Umutoza w’Ikipe y’Igihugu y’u Rwanda ya Tennis yo ku meza, Yves Ndizeye ari na we wari uhagarariye itsinda ryagiye muri Kenya, yavuze ko n’ubwo bitagenze neza nk’uko babyifuzaga, ariko hari ikizere ko mu marushanwa mpuzamahanga ari imbere ibikombe bizataha mu Rwanda.

Ati “N’ubwo bitagenze neza nk’uko twabyifuzaga, ariko hari ikizere ko mu marushanwa mpuzamahanga ari imbere intsinzi zizataha mu Rwanda, kuko ibyo bagenzi bacu cyane cyane Abanya-Misiri baturushije, tugiye kubyigira hamwe tuzamura urwego dukina imikino myinshi, bizatuma dusubirayo umwaka utaha natwe turi abakinnyi bo kwitegwa".

Amarushanwa agiye gukurikiraho muri iri shyirahamwe, harimo iryo kwibuka (Genocide Memorial Tournament GMT), rizaba mu kwezi kwa Kamena, Shampiyona ndetse na Chinese Ambassadors Cup 2023.