Kigali International Peace Marathon biteganijwe ko izabera i Kigali ku cyumweru tariki ya 21 Gicurasi 2017.

Madame Margaret Kenyatta yabitangaje abicishije ku rubuga rwe rwa Twitter.

Madame Jeannette Kagame nawe abicishije ku rubuga rwe rwa Twitter yashimangiye aya makuru avuga ko yiteguye kwakira Madame wa Perezida wa Kenya ari we, Mrs Kenyatta, aho bazifatanya muri iyi Marathon biruka ibirometero birindwi.

Iri siganwa ry’amahoro ryitabirwa n’abasanzwe bakora umukino wo gusiganwa ku maguru bya kinyamwuga hamwe n’abasiganwa byo kwishimisha no gukora siporo.

Muri Werurwe 2016 Margaret Kenyatta na Jeannette Kagame, na bwo bifatanije mu isiganwa ku maguru ryabereye i Nairobi mu Murwa mukuru wa Kenya.

Iryo siganwa bifatanijemo ryitwaga ‘Beyond Zero Campaign’ rikaba ryari rigamije kugabanya impfu z’abana n’abagore aho bakusanije inkunga yo gushyigikira iyi gahunda irenga miliyoni 300 z’amashiringi ya Kenya.