Irushanwa rya ‘Cross Country’ ryaherukaga muri 2019 ryagarutse
Kuri iki Cyumweru tariki 14 Ugushyingo 2021, mu Mujyi wa Kigali harongera kubera irushanwa ryo gusiganwa ku maguru rya Cross Country, ryaherukaga kuba mu 2019.
Mu marushanwa ategurwa buri mwaka na Federasiyo y’imikino ngororamubiri mu Rwanda (Rwanda Athletics Federation), habamo n’iryitwa Cross Country, aho abasiganwa bakoresha inzira/Utuyira bisanzwe.
Ni muri urwo rwego kuri iki cyumweru biza kuba ari ibicika mu nzira zo muri IPRC Kigali ahasanzwe habera iryo rushanwa, ubwo amakipe nka APR Athletics Club inafite igikombe izaba yabukereye.
Abakinnyi 248 ni bo biteganyijwe ko bazigaragaza baturutse mu makipe atandukanye nka: APR, NAS, Police, Mountain Classic A.C, Rutsiro A.C, Huye A.C, Nyamasheke A.C, Vision Jeunesse Nouvelle, Rwamagana A.C, Kavumu A.C, Kamonyi A.C, Sina Gerard A.C, UR Huye campus, UR-Physical Education Campus.
Abo bose bakazasiganwa mu bice 2, abagabo n’abagore, ariko buri cyiciro nacyo kikagira ibice bitatu aribyo:
– Abakuru (Senior)
– Abato batarengeje imyaka 20
– Abato batarengeje imyaka 18
Mu bagabo bakuru bazasiganwa ibilometero 10, abatarengeje imyaka 20 bazasiganwa ibilometero 8 naho abato babo batarengeje imyaka 18 basiganwe ibirometero 6.
Mu bagore bakuru, bazasiganwa ibilometero 10, abatarengeje imyaka 20 bazasiganwa ibilometero 6 naho abato babo batarengeje imyaka 18 basiganwe ibilometero 4.
Iri rushanwa ryaherukaga kuba mu mwaka wa 2019 mbere y’uko riza guhagarikwa na Covid-19, ikipe ya APR Athletics Club ni yo iheruka kuryegukana.
Ibitekerezo ( 1 )
Ohereza igitekerezo
|
ese umumtu ushaska gusiganwa kandi atari muri ariya ma ekipe ntago byashoboka ?
ese nshobora kwiyandikisha mu ikipe iyo ariyo yose byashoboka ? mwansobanurira