Ibihangange ku isi mu mukino wa Taekwondo birahatanira mu Rwanda kuri uyu wa Gatandatu

Yanditswe na

Sammy Imanishimwe

15-07-2022 - 19:05' | Ibitekerezo ( )

Bamwe mu bakinnyi bafite izina rikomeye ku isi mu mukino wa Taekwondo, bari mu Rwanda aho bitabiriye shampiyona ya Afurika iri kubera mu Rwanda

Guhera ku wa Gatatu tariki 13/07/2022, mu Rwanda hakomeje kubera shampiyona ya Afurika mu mukino wa Taekwondo, aho iminsi ibiri ya mbere bakinnye icyiciro cyo kwiyerekana kizwi ku izina rya Poomsae.

Guhera kuri uyu wa Gatandatu barinjira mu cyiciro kizwi nka Kyorugi ubusanzwe mu mikino nka Karate kimenyerewe nka Kumité, aho abakinnyi babiri barwana hagati yabo.

Mu Rwanda hahuriye ibihangange

Muri iyi shampiyona, mu Rwanda hahuriye abakinnyi b’ibihangange banegukanye imidali ya zahabu yo ku rwego rw’isi. Muri abo bakinnyi harimo umunya-Côte d’Ivoire Cheick Sallah Cissé wegukanye shampiyona ya Afurika ya 2021, yegukana umudali wa Zahabu mu mikino Olempike yabereye i Rio muri Brazil 2016.

Cheick Sallah Cissé ukomoka muri Cote d'Ivoire wegukanye umudali wa zahabu i Rio 2016

Barimo kandi n’umukobwa Ruth Marie Christelle Gbagbi nawe ukomoka muri Cote d’Ivoire wegukanye umudali wa Bronze mu mikino Olempike ya 2016 i Rio, yegukana umudali wa Bronze muri shampiyona y’isi ya 2016 n’iya 2020.

Uyu Ruth Marie Christelle Gbagbi yegukanye kandi umudali wa zahabu muri shampiyona y’isi ya 2017, anegukana Umudali wa Zahabu muri shampiyona ya Afurika iheruka kubera i Dakar muri Senegal 2021.

Ruth Marie Christelle Gbagbi (Cote d'Ivoire) yegukanye shampiyona y'isi 2017

Undi mukinnyi ukomeye ni Ababacar Sadikh Soumaré wo muri Senegal wegukanye umudali wa zahabu muri shampiyona ya Afurika yabereye Agadir 2018, naho muri shampiyona ya Afurika ya 2021 yabereye I Dakar yegukana umudali wa Bronze.