Ubuyobozi bukuru bw’ikipe nibwo bwafashe icyemezo cyo gutanga aya mafaranga nyuma yo gusanga ko yakoze akazi gakomeye kandi akaba ari ku nshuro ya mbere abo bakinnyi n’abatoza bahabwa agahimbazamusyi kangana gutyo kuva iyo kipe yabaho nk’uko bitangazwa na Kiganda Francois ushinzwe umutungo w’ikipe.

Agira ati “ayo mafaranga twarayabahaye barayagabagabana. Ubusanzwe nta mushahara abakinnyi bagira, ahubwo iyo batsinze umukino tubaha agahimbazamusyi kangana n’ibihumbi 10, banganya bagahabwa 5000 naho batsindwa ntihagire ayo babona”.

Kiganda avuga ko kuri ubu abakinnyi bahawe ikiruhuko cyo gutaha bitegura icyumweru cy’icyunamo cy’abazize Jenoside yakorewe Abatutsi bakazagaruka tariki 14/04/2013.

Nibagaruka, abakinnyi ngo bazatangira imyitozo ikarishye bitegura imikino ya shampiyona ndetse n’iya 1/4 ya Peace Cup against Malaria 2013 kandi uko ubushobozi buzakomeza kuboneka ikipe izajya ihabwa agahimbazamusyi gatubutse; nk’uko Kiganda yakomeje abisobanura.

Ikipe ya Bugesera FC ubwo yakinaga na Rayon Sports muri 1/8 cya Peace Cup against Malaria 2013.

Mu bakinnyi Bugesera FC ifite nta munyamahanga n’umwe urimo kandi abenshi ni abanyeshuri kandi muri bose uwo baguze amafaranga menshi ni ibihumbi 200, 150, 100, 70 ndetse 50.

Kuri ubu ngo ikipe ya Bugesera ifite ikibazo cy’ikibuga kuko icyo bakoreshaga cyafunzwe kubera ko kiri hafi y’umuhanda, ubu bakaba bakoresha icya FERWAFA bityo ntibabashe kubona abafana benshi bo kubashyigikira.

Perezida w’ikipe akaba n’umuyobozi w’akarere ka Bugesera, Rwagaju Louis, avuga ko ikibuga cy’i Nyamata cyafunzwe kubera ko cyegereye umuhanda cyatezaga ibibazo n’umutekano mucye mu muhanda.

Ati “ubu turimo gutegura ikibuga muri ETO Nyamata, turateganya ko ikipe izatangira kugikiniraho umwaka utaha”.

Intego y’ikipe ni ukujya mu kiciro cya mbere ndetse byanashoboka igatwara igikombe cya Peace Cup against Malaria 2013.

Kuri ubu ikipe ya Bugesera iyoboye itsinda rya kabiri n’amanota 39. Naho muri 1/4 cya Peace Cup against Malaria 2013 ikaba yaratomboye Vision.

Egide Kayiranga