#FAWBL2023: REG WBBC iragaruka mu kibuga icakirana na Equity BANK

Yanditswe na

Amon B. Nuwamanya

13-12-2023 - 14:37' | Ibitekerezo ( )

Ikipe ihagarariye u Rwanda mu mikino ihuza amakipe yabaye aya mbere iwayo muri Afurika REG WBBC, kuri uyu mubgoroba iracakirana na Equity Bank yo muri Kenya.

Umunyamerikakazi Tiffany Mitchell ni we wari uhetse ikipe

Muri iri rushanwa rikomeje kubera mu gihugu cya Misiri, ikipe ihagarariye u Rwanda ya REG WBBC imaze gutsinda imikino 2 yikurikiranya.

Iyi kipe ikomeje kwitwara neza aho mu mukino ubanza yakinnye na Overdose Up Station yo muri Cameroon iyitsinda amanota 77 kuri 35, mu gihe kuri uyu wa kabiri yatsinze ikipe ya Grupo Desportivo Interclube yo muri Angora n’amanota 96 kuri 89.

Umunyamerikakazi Tiffany Mitchell usanzwe ukinira ikipe ya REG WBBC, ari ku ruhembe rw’abafashije ikipe ya REG WBBC gutsinda umukino wa 2.

Iri rushanwa ruhuje amakipe 10 arimo na REG WBBC ihagarariye u Rwanda, bari mu gihugu cya Misiri mu mujyi wa Alexandria aho barimo guhatanira igikombe cya FIBA AFRICA WOMEN BASKETBALL LEAGUE akaba ari no ku nshuro ya mbere ikipe ya REG BBC yitabiriye iri rushanwa.

Mu gace ka mbere k’uyu mukino, ibintu bisa nk’aho byari bitarasobanuka dore ko amakipe yombi yagasoje anganya amanota 27-27.

Mu gace ka kabiri, ni bwo ikipe ya REG WBBC yashyizemo ikinyuranyo kinini ndetse ubona ko ari na cyo cyabinjije mu mu mukino neza dore ko aka gace bagatsinze ku manota 33 kuri 19 ya Grupo Desportivo Interclube maze amakipe yambi ajya kuruhuka ikipe ya REG WBBC iri imbere.

Destiney Promise PHILOXY wa REG WBBC agenzura umupira

Nyuma yo kumva inama z’abatoza, ikipe zombi zagarutse mu gace ka gatatu amakipe yombi akoresha imbaraga ziringaniye gusa ukabona ikipe ya REG WBBC iri imbere binyuze cyane ku bakinnyi bayo nka Tiffany Mitchell na Nia Clouden bitwaye neza muri uyu mukino muri rusange.

Gusa ikipe ya Grupo Desportivo Interclube yakomeje kwihagararaho ndetse yegukana aka gace ku manota 20 kuri 14 ya REG WBBC ibitagize kinini bihundura ku giteranyo cy’amanota yose kuko REG WBBC yari yashyizemo ikinyuranyo mu gace kabanje.

Agace ka kane ari nako ka nyuma, nako kegukanywe n’ikipe ya Grupo Desportivo Interclube ku manota 23 kuri 22 bivuze ko harimo ikinyuranyo cy’inota 1 ritabashije guha iyi kipe intsinzi.

REG WBBC kujyeza ubu iri ku mwanya wa mbere n’amanota 4 ikaba iyoboye urutonde mu itsinda bahuriyemo ari amakipe 5.

Ikipe ya EQUITY BANK yo mu gihugu cya Kenya iri bucakirane na REG kuri uyu mugoroba, yo iri ku mwanya wa gatatu n’amanota 3.