Gicumbi HT na Kiziguro SS zegukanye #CoupeDuRwanda 2022 (AMAFOTO)

Yanditswe na

Sammy Imanishimwe

21-11-2022 - 14:16' | Ibitekerezo ( )

Ikipe ya Gicumbi Handball Team na Kiziguro SS ni zo zegukanye ibikombe mu irushanwa “Coupe du Rwanda” ryabaye mu mpera z’iki cyumweru mu mukino wa Handball

Guhera ku wa Gatandatu tariki 19/11 kugera ku Cyumweru tariki 20/11 ku bibuga bya Busanza, UR Gikondo na Kimisagara haberaga irushanwa rya Handball rizwi nka Coupe du Rwanda.

Mu bagabo ikipe ya Gicumbi yageze ku mukino wa nyuma nyuma yo gutsinda ikipe ya APR HC ibitego 30 kuri 23, ihahurira na Police HC yari yatsinze ikipe ya Visiion Jeunesse Nouvelle ibitego 50 kuri 20.

Ku mukino wa nyuma ikipe ya Gicumbi yaje kwegukana igikombe itsinze Police HC ku bitego 38 kuri 25, aho igice cya mbere cyari cyarangiye Gicumbi ifite ibitego 19 kuri 16.

Kapiteni w'ikipe ya Gicumbi HT ashyikirizwa igikombe na Perezida wa FERWAHAND

Mu bagore, ikipe ya Kiziguro SS ni yo yaje kwegukana iki gikombe itsinze ISF Nyamasheke ibitego 34 kuri 23, mu gihe muri ½ ho yari yasezereye ikipe ya GS Kitabi ibitego 33 kuri 18.

Kiziguro SS yegukanye igikombe mu bagore

Ikipe y’abakobwa ya Kiziguro SS ni imwe mu makipe afite abaterankunga aho iterwa inkunga na Kompanyi icukura amabuye y’agaciro yitwa Gamico Mining Company, iyi kipe ikaba iteganya no kwitabira irushanwa rya ECAHF rizabera Zanzibar mu kwezi gutaha.

Kiziguro SS yashyirijwe igikombe na Visi-Perezida wa mbere wa FERWAHAND, Dr Akumuntu Joseph

Usibye ikipe ya Kiziguro ikipe ya Gicumbi HT nayo iterwa inkunga n’akarere ka Gicumbi, ikaba nayo ishobora kwitabira iri rushanwa rizabera muri Zanzibar, aho iyi kipe yari yasabwe n’akarere kwegukana iki gikombe nyuma yo kudatwara shampiyona.