Ku munota wa 55 w’umukino ikipe ya Celta Vigo nyuma yo gushotwa amashoti menshi mu izamu na Barcelona ariko ntagire icyo atanga, yo yaje kwinjiza igitego cyatsinzwe n’umukinnyi Joaquin Larrivey.

Uyu ni umukino wa 2 ikipe ya Barcelona itsinzwe ukaba ari uwa mbere itsindiwe iwayo kuko uwo iheruka gutsindwa yawutsinzwe na Real Madrid I Santiago Bernabeau.

Imikino 2 Barcelona imaze gutsindwa itumye umutoza Luis Enrique n’abakinnyi be bafata umwanya wa 4 muri Shampiyona mu gihe Real Madrid ikomeje urugendo rwo gutsinda kuko yisasiye Granada ku bitego 4-0.

IKipe ya Celta Vigo yishimiye instinzi nyuma yo gutsinda FC Barcelona.

Kuri ubu ikipe ya Real Madrid iri imbere n’amanota 24 n’ibitego 27 izigamye, Valencia ku mwanya wa 2 n’amanota 23 n’ibitego 14 izigamye. Ni mu gihe nyuma y’aho ikipe ya Atletico Madrid nayo itsindiye ikipe ya Cordoba 4-2 yahise ifata umwanya wa 3 n’amanota 23 n’ibitego 10 izigamye. Barcelona iri ku mwanya wa 4 n’amanota 22 n’ibitego 19 izigamye kandi ikaba inganya amanota na Seville izigamye 7 gusa.

Mu mukino wahuje Real Madrid na Granada watumye Cristiano Ronaldo mu mikino 12 amaze gukina yuzuza igitego cya 20, yatsinze ku munota wa 2 gusa umukino ugitangira. Muri uyu mukino James Rodriguez yatsinzemo ibitego 2 naho Benzema atsinda 1.

James Rodriguez na bagenzi be bafashije ikipe ya Real Madrid gutsinda Granada.

Ku rundi ruhande mu Bwongereza mu mujyi w’i Manchester byari ibicika kuri uyu wa 2 Ugushyingo, aho amakipe 2 yo muri uwo mujyi ariyo Manchester City na Manchester United yahuye bikaza kurangira ikipe ya Manchester City yegukanye insinzi ya 1-0 nyuma yo gutsindwa muri Capital One Cup na Newcastle ibitego 2-0, ndetse no muri champion’s league ikanganya na CSKA Moscou 2-2.

Sergio Aguero rutahizamu wa Manchester City niwe watsinze igitego rukumbi cyabonetse mu mukino wahuzaga Manchester City na Mancester United i Etihad Stadium kwa Manchester City ku munota wa 63.

Umutoza wa MAN U mu bihe bibi nyuma yo gutsindwa na MAN City.

N’ubwo ikipe ya Manchester City itarushije umukino Man U byaje kugora Man U ubwo umukinnyi wayo Chris Smalling yahabwaga ikarita y’umutuku hakiri kare, ikintu kitashimishije Luis Van Gaal ku buryo uyu mukinnyi yitwaye ahabwa amakarita 2 y’umuhondo.

Kuri ubu ikipe ya Chelsea ikomeje kuyobora Premier league n’amanota 26 nyuma yo gutsinda Queen park Rangers 2-1, ni mu gihe ikipe ya Southampton ya 2 yatsinze Hull City 1-0 ikaba ifite 22, Manchester City iza ku mwanya wa 3 n’amanota 20 naho Arsenal ikaba yazamutse ku mwanya wa 4 n’amanota 17 nyuma yo gutsinda Burnely 3-0.

Liverpool iri ku mwanya wa 7 naho Manchester United ikaba yageze ku mwanya wa 10 n’amanota 13 nyuma yo gutsindwa.

Sanchez akomeje gufatira runini ikipe ya Arsenal.

Safari Viateur