Ni imikino ine yakinwe kuri uwo munsi, ikinirwa mu bice bitandukanye by’Igihugu. I Kigali kuri Pelé Stadium, Police FC iri mu bihe bikomeye yari yakiriye AS Kigali. Police FC itari yatsinda umukino n’umwe kuva imikino yo kwishyura yatangira muri Mutarama 2024 n’ubundi uyu munsi ntabwo byayihiriye kuko igitego kimwe rukumbi cya Shaban Hussein Tshabalala ku munota wa 42 kuri penaliti cyanarangije uyu mukino, cyatumye Police FC yuzuza umukino wa gatandatu idatsinda, aho yatsinzwemo ine(4) inganya ibiri. Uyu mukino watumye AS Kigali igira amanota 31 ku mwanya wa gatandatu ikurikiye iyi Police FC iri ku mwanya wa gatanu n’amanota 33.

Mu Karere ka Rubavu, ikipe ya Kiyovu Sports yari yakiriwe na Marine FC iri kurwana no kuva mu myanya ya nyuma. Marine FC ibifashijwemo na Fabio Nkundimana ku munota wa 13, Ishimwe Jean René ku munota wa 40 ndetse na Sultan Sibomana ku munota wa 48 bayitsindiye ibitego, yatsinze Kiyovu Sports yugarijwe n’ibibazo byo hanze y’ikibuga ibitego 3-0 aho byafashije Marine FC kugira amanota 25 ku mwanya wa 11 iriho, mu gihe Kiyovu Sports iri ku mwanya wa cyenda n’amanota 28.

Mu makipe amanuka harimo Etoile de l’Est isa nk’iyagiye, dore ko iri ku mwanya wa nyuma n’amanota 13. Iyi kipe uyu munsi yakinaga na Muhazi United maze ibitego bya Abdul Amin ku munota wa 24 na Caleb Mbanza bihesha Muhazi United amanota atatu itsinze 2-0 igira amanota 28 ayishyira ku mwanya wa munani. Kuri stade Mpuzamahanga ya Huye, Amagaju FC yari yakiriye Gasogi United maze Amagaju FC yo mu Karere ka Nyamagabe ahabonera intsinzi y’ibitego 2-0 yuzuza amanota 30 ayishyira ku mwanya wa karindwi mu gihe Gasogi United iri ku mwanya wa cumi n’amanota 25.

Imikino iteganyijwe kuri iki Cyumweru:

Mukura VS na APR FC kuri stade Mpuzamahanga ya Huye
Etincelles FC na Sunrise FC kuri Stade Umuganda
Gorilla FC na Bugesera FC kuri Kigali Pelé Stadium