Muri iyo gahunda izakorerwa mu gihugu hose ahari amashyirahamwe y’abafana b’iyo kipe, abakunzi bayo bazajya bakusanya amafaranga azashyikirizwa ikipe mbere y’uko shampiyona itangira, akazanakoreshwa mu kugura abakinnyi bashya bazafasha iyo kipe muri shampiyona itaha.

Umuyobozi w’abafana ba Rayon Sport, Jean Claude Muhawenimana, yadutangarije ko mu gutangiza iyo gahunda, abafana bagize ishyirahamwe ryitwa ‘Gukundiro Fan club’ bemeye gutanga amafaranga miliyoni 3, bakaba yabashyikirije ubuyobozi bw’ikipe kuri uyu wa gatatu tariki 10/07/2013.

Muhawenimana Claude, umuyobozi w’abafana ba Rayon Sport ku rwego rw’igihugu.

Rayon Sport ikunze gukora gahunda nk’iyi buri mwaka, aho abakunzi bayo batanga amafaranga binyuze mu butumwa bugufi bohereza bakoresheje telefoni, abandi bakayatanga binyuze mu makarita y’abanyamuryango bagura, aba ari mu byiciro bitandukanye bitewe n’amafaranga batanze.

Nyuma yo kubona iyo nkunga, ikipe ya Rayon Sport irateganya kuzazenguruka igihugu ikina imikino ya gicuti, inamurikira abakunzi bayo bari hirya no hino mu Rwanda abakinnyi bashya izaba yaraguze.

Rayon Sport yegukanye igikombe cya shampiyona giheruka, izahagararira u Rwanda mu gikombe gihuza amakipe yabaye aya mbere iwayo muri Afurika (CAF Champions League).

Theoneste Nisingizwe