Rayon Sport yanganyirije ubusa ku busa i Dolisie mu mukino ubanza wakinwe ku cyumweru gishize, irasabwa gutsinda nibura igitego kimwe ku busa kugirango yizere gusezerera AC Leopard.

Umutoza wa Rayon Sport Luc Eymael avuga ko ikipe ye yeyiteguye neza kandi ahamya ko abakinnyi be bafite ubushobozi bwo gutsinda uwo mukino cyane ko intego ye ari ugusatira kuva umukino ugitangira.

“Nibyo ikipe ya AC Leopard ifite amikoro ahambaye ugereranyije na Rayon Sport. Banafite abakinnyi bakomeye , ariko nkurikije umukino bakiniye iwabo n’ubuhanga ikipe yanjye yagaragaje, ndahamya ko dushobora kuyisezerera.

Tugomba gutangira umukino dusatira kuko dusabwa gutsinda igitego, kandi abakinnyi banjye biteguye kubikora.”

Rayon Sport irakina uwo mukino idafite umunyezamu wayo Ndayishimiye Jean Luc ‘Baame’ wahawe ikarita y’umutuku mu mukino ubanza, ndetse na Hategekimana Aphrodis ‘Kanombe’ wavunikiye mu mukino ubanza.

Kapiteni wa Rayon Sport Fuadi Ndayisenga avuga ko ari nta cyuho ikipe yabo ifite kuko hari abandi bakinnyi benshi bashobora kubasimbura. Bikorimana Gerard usanzwe ari umunyezamu wa kabiri niwe uzaba kuba ari izamu rya Rayon Sport muri uwo mukino.

Patrick Aussems,umutoza w’ikipe ya AC Leopard yageze mu Rwanda ku wa kane tariki ya 13/2/2014, avuga ko n’ubwo atabshije gutsindira mu rugo, yizeye gutsindira i Kigali, agasezerera Rayon Sport kuko ngo afite abakinnyi bakomeye kandi bafite inararibonye mu gusezerera amakipe akinira ku bibuga byayo.

Ikipe ya AC Leopard ifite amateka ku rwego rwa Afurika kuko yatwaye igikombe cya ‘Confederation Cup’ muri 2012, ndetse igera muri ¼ cy’irangiza muri ‘CAF Champions League’ umwaka ushize, naho Rayon Sport yaherukaga mu marushanwa nyafurika muri 2005, ikaba ari nta mateka ahambaye ifite hanze y’u Rwanda.

Ikipe izakomeza hagati ya Rayon Sport na AC Leopard Dolisie, muri 1/16 cy’irangiza izakina n’izarokoka hagati ya Primeiro d’Agosto yo muri Angola na Lioli yo muri Lesotho.

Theoneste Nisingizwe